Astanada aýyl sharýashylyǵy jármeńkesine eki kúnde 50 myń adam bardy
ASTANA. KAZINFORM — 17 jáne 18 qazan kúnderi Astanada Soltústik Qazaqstan, Pavlodar jáne Ulytaý oblystarynyń taýar óndirýshileri qatysqan aýyl sharýashylyǵy jármeńkesi ótti. Eki kún ishinde jármeńkege 50 myńnan astam adam keldi, dep habarlaıdy Astana ákimdiginiń resmı saıty.
Elordaǵa 1600 tonnadan astam ónim jetkizildi. Onyń ishinde et jáne sút ónimderi, kókónister, jemister, bal, azyq-túlik taýarlary jáne basqa da ónimder usynyldy.
Úsh óńirdiń óndirýshileri jármeńkege 300 tonnaǵa jýyq et jáne et ónimderin, onyń ishinde sıyr, jylqy jáne qoı etin ákeldi.
Sonymen qatar qosalqy et ónimderi, qazy men qarta qoljetimdi baǵamen satyldy. Úırek pen qaz etin de naryqtaǵydan tómen baǵamen satyp alýǵa múmkindik boldy. Balyq ónimderiniń de túr-túri usynyldy. Kelýshiler sazan, kókserke, forel jáne albyrt balyǵyn satyp ala aldy.
— Men jármeńkege eki kún qatarynan keldim. Keshe kókónister men jemister satyp aldym. Mundaǵy baǵalar dúkenderge qaraǵanda tómen. Pııaz, kartop, un, sábiz aldym. Búgin et alýǵa keldim. Ettiń baǵasy naryqtaǵydan áldeqaıda arzan, — dedi elorda turǵyny.
Sút ónimderiniń de tańdaýy mol boldy. Úı súti, aıran, súzbe, qaımaq, sary maı jáne irimshiktiń túrli suryptary tıimdi baǵamen satyldy.
— Biz Pavlodar oblysynan úıde daıyndalǵan sary maıdyń eki túrin — tuzdalǵan jáne tuzdalmaǵan maı ákeldik. Keshe 65 keli maı sattym, al búgin nebári eki saǵattyń ishinde shamamen 15 keli maı ótti. Biz jyl saıyn elordaǵa óz ónimderimizdi ákelemiz. Adamdar dámin tatyp kóredi, unatady jáne qýana satyp alady, — dedi Pavlodar oblysynan kelgen kásipker.
Kelýshiler arasynda Baıanaýyl men Jańaarqanyń qymyzy erekshe suranysqa ıe boldy. Sondaı-aq satyp alýshylar Ulytaý oblysynan ákelingen tuzdy qurtty da belsendi túrde satyp aldy.
— Eń dámdi qymyzdy Jańaarqadan tabýǵa bolady. Biz bir lıtrin 1700 teńgege satyp aldyq. Tabıǵı ónim, dámi óte keremet, — dep bólisti astanalyq turǵyn.
Jármeńkede baldyń túrli suryptary men kúnbaǵys maıy da usynyldy.
Budan bólek, Pavlodar oblysynyń óndirýshileri úı jaǵdaıynda daıyndalǵan shujyqtar men irimshikterdiń keń assortımentin usyndy. Kókónister men jemisterge de suranys joǵary boldy. Saýda sórelerinen alma, almurt, qurma, banan, júzim, mandarın jáne apelsın tabýǵa bolatyn edi.
— Qarbyz ben eki qaýyn satyp aldym. Óte úlken eken, dámdi bolady dep oılaımyn. Baǵalary da jaqsy. Jaqynda qarbyz ben qaýyndy jármeńkelerden de, dúkender men bazarlardan da tabý qıyn bolady. Maýsym aıaqtalyp kele jatqandyqtan, adamdar satyp alyp úlgerýge tyrysyp jatyr, — dedi elorda turǵyny.
Sonymen qatar jármeńkede jıdekterdiń túrli túrleri men shaıdyń keń assortımenti satyldy. Atap aıtqanda, kók shaı, qara shaı, shóp shaıy, jemis jáne zimbir shaılary, sondaı-aq túrli shóp qospalary usynyldy.
Kásipkerler daıyn ónimderdi de ákeldi. Olardyń qatarynda úı jaǵdaıynda daıyndalǵan salattar men túrli pisirilgen nan-toqash ónimderi boldy. Azyq-túlik taýarlarymen qatar kelýshilerge qolóner buıymdary da usynyldy. Sheberlerdiń biri jármeńkege aǵashtan jasalyp, qazaqtyń ulttyq oıý-órnekterimen bezendirilgen dombyralardy alyp keldi.
Kelýshiler úshin kontserttik baǵdarlama uıymdastyryldy. Jármeńke elorda turǵyndaryna otandyq sapaly ónimderdi qoljetimdi baǵamen satyp alýǵa, al óńirlik óndirýshilerge óz taýarlaryn kópshilikke tanystyrýǵa múmkindik berdi.
Buǵan deıin Astanada Atyrau Creative Days jármeńkesi ashylǵanyn jazdyq.
