Astanada aýyl sharýashylyǵy jármeńkesi maýsymyn Túrkistan oblysynyń sharýalary ashady

ASTANA. KAZINFORM - Elordada óńirlik taýar óndirýshilerdiń qatysýymen jyl saıynǵy aýyl sharýashylyǵy jármeńkesi bastalady. Jármeńke 26 qazanǵa deıin ár senbi jáne jeksenbi kúnderi ótkiziledi, dep jazdy Astana ákimdiginiń resmı saıty.

Alǵashqy jármeńke 30 tamyz kúni ótedi. Onda Túrkistan oblysynyń sharýalary óz ónimderin elorda turǵyndaryna usynady. Іs-shara barysynda et, balyq, sút, bakaleıa ónimderi, kókónis pen jemis-jıdek syndy ártúrli taýarlar fermerlerden tikeleı satylymǵa shyǵarylady.

Bul azyq-túlik qoljetimdiligin arttyryp qana qoımaı, otandyq óndirýshilerdi qoldaýǵa da yqpal etedi. Atap aıtqanda, Túrkistan oblysynyń aýylsharýashylyq taýar óndirýshileri Astanaǵa 600 tonnadan astam ónim ákeledi. Onyń ishinde 200 tonna kókónis, 100 tonna et pen et ónimderi, 100 tonna sút ónimderi, 80 tonna baqsha daqyldary, 50 tonna jemis-jıdek, 19 tonna balyq, 12 myń dana jumyrtqa jáne 60 tonnadan astam basqa da azyq-túlik ónimderi bar.

Jármeńke aıasynda kontserttik baǵdarlama da uıymdastyrylady. Aıta ketý kerek, bıyl jármeńke «Qazanat» ıppodromynyń avtoturaǵynda (Qarqaraly tas joly, 1) ótedi.

Turǵyndar men qonaqtardyń qolaıly kelip-ketýi úshin jármeńke kúnderi №18, 37 jáne 303 baǵyttaǵy avtobýstar qatynaıdy.

Aýylsharýashylyq jármeńkesi saǵat 9:00-den 18:00-ge deıin jumys isteıdi.

Aıta keteıik, Astanadaǵy jármeńkede 1000-nan asa bos oryn usynyldy.