Astanada Aýǵanstannan áskerlerdi shyǵarýdyń 25 jyldyǵyna oraı ınternatsıonalıst jaýyngerlerdi eske alý rásimi ótedi
ASTANA. QazAqparat - Keńes áskerleriniń shekteýli kontıngentiniń Aýǵanstan aýmaǵynan shyǵarylǵanyna 25 jyl boldy. 1979 jylǵy 25 jeltoqsannan - 1989 jylǵy 15 aqpanǵa deıin 10 jylǵa jýyq ýaqyt boıy jaýyngerler Aýǵan aýmaǵynda ınternatsıonaldyq boryshtaryn ótedi. Oǵan 22 269 qazaqstandyq qatysty, sonyń ishinde 924-i qaza tapsa, 1015 múgedek bolyp, 21 habar-osharsyz ketti.
Búgin, 15 aqpanda barsha Qazaqstanda qaza tapqan ınternatsıonalıst jaýyngerlerdi eske alý rásimderi ótip, soǵys ardagerlerine qurmet kórsetiledi. Astana da tys qalǵan joq. Kúni boıy elordada birqatar is-sharalar uıymdastyrylady. Bul týraly astana.kz saıtyna Astana qalasynyń «Aýǵanstan soǵysy múgedekteri men ardagerleri odaǵy» QB habarlady.
Dástúr boıynsha bul kúni Aýǵan soǵysynyń jaýyngerleri, qaza bolǵandardyń ata-analary, dostary, jaqyndary ortalyq meshitke jáne pravoslav shirkeýine barady. Sondaı-aq, eske alý kúni aıasynda saǵat 12.00-de Q.Muńaıtpasov jáne Abylaıhan dańǵylynyń qıylysyndaǵy Aýǵanstanda qaza tapqan ınternatsıonalıst- jaýyngerlerge arnalǵan respýblıkalyq memorıalda is-shara uıymdastyrylady.
Al saǵat 14.00-de Beıbitshilik jáne Kelisim saraıynda Astana qalasy ákimdiginiń qoldaýymen saltanatty kontsert ótedi.
Atalǵan is-sharaǵa qaza bolǵan jaýyngerlerdiń týystary, Aýǵan soǵysynyń ardagerleri, túrli qoǵamdyq uıymdardyń ókilderi men resmı tulǵalar, elordanyń orta jáne joǵary oqý oryndarynyń oqýshylary, Astana qalasynda ornalasqan áskerı bólimshelerdiń ókilderi shaqyryldy.
