Astanada Aýǵanstandaǵy áıelderdiń quqyqtaryn qorǵaý týraly deklaratsııa qabyldandy
Qujatqa sáıkes, qatysýshylar Aýǵanstandaǵy áıelderdiń quqyqtary men múmkindikterin keńeıtýdi qoldaýǵa baǵyttalǵan sharalardy turaqty túrde ótkizýdi maquldaıdy jáne Ortalyq Azııa elderi úkimetteriniń Aýǵanstannyń áleýmettik-ekonomıkalyq damýy men ondaǵy ahýaldy turaqtandyrýǵa jumsaǵan kúsh-jigerin quptaıdy. Olar Aýǵanstandaǵy áıelder men qyzdardyń ómiri men bilim berý jaǵdaıyn jaqsartýdyń el ekonomıkasyn kóterýge, jumys oryndaryn qurýǵa, zorlyq-zombylyq jáne ekstremızmmen kúreske oń yqpal etedi dep esepteıdi.
Sonymen birge deklaratsııada barlyq múddeli taraptar óńirdegi jáne Aýǵanstandaǵy belsendi áıelderdiń aımaqtyq jelisi retinde arnaıy konsýltatıvtik organ qurý múmkindigin qarastyrýǵa shaqyrylǵan. Bul konsýltatıvtik organ áıelderdiń quqyqtary men múmkindikterin keńeıtýdi jáne olardyń saıası sheshimderdi qabyldaý, saıası kelissózder men konsýltatsııalar, ekonomıkalyq quqyqtar men múmkindikterdi keńeıtý, bilimge qol jetkizý, densaýlyq saqtaý syndy barlyq salalarǵa tikeleı qatysýyn qamtamasyz etpek.
Qatysýshylar barlyq múddeli taraptardy Aýǵanstandaǵy jáne aımaqtaǵy áıelderge tıesili shaǵyn jáne orta kásiporyndarǵa kómek kórsetýge, aımaqtyq jáne ǵalamdyq naryqtarǵa qol jetkizýdi qamtamasyz etýge shaqyrady. Sondaı-aq, qujatta qatysýshylar barlyq múddeli taraptardy, sonyń ishinde qarjy ınstıtýttaryn Aýǵanstanda áıelderge tıesili kásiporyndar úshin mamandandyrylǵan ınfraqurylymy men jumysqa ornalasý múmkindigi bar eksklıýzıvti ındýstrııalyq park qurýdy qarastyrýǵa shaqyrady.
Konferentsııa aıasynda Qazaqstan, Ózbekstan jáne Eýropalyq Odaq Aýǵanstannyń basym baǵdarlamalaryna sáıkes Qazaqstan men Ózbekstannyń joǵary oqý oryndarynda aýǵan áıelderin kásibı-tehnıkalyq daıarlaý jáne oqytý boıynsha pılottyq joba bastamasyn usyndy. Sonymen birge, Qazaqstan Úkimeti densaýlyq saqtaý salasyndaǵy zamanaýı tehnologııalar jáne ınnovatsııalarmen, tájirıbelermen bólisýge daıyn ekendigin jetkizdi.
Búgingi sharada Aýǵanstan áıelderiniń Saýda-ónerkásip palatasy men Qazaqstan Іsker áıelder qaýymdastyǵy jáne Atameken UKP janyndaǵy Іsker áıelder keńesi arasynda ózara túsinistik týraly memorandýmǵa qol qoıyldy. Sonymen birge, Konferentsııa qatysýshylary Qazaqstan Úkimetiniń 2019-2020 jyldary Aýǵan jastaryna bólinetin oqý stıpendııalarynyń basym bóligin áıelderge berý týraly sheshimin qýanyshpen qabyldaıdy jáne ózge donor-elderdi kóbirek stıpendııalar bólýge, aýǵan áıelderine arnalǵan onlaın-kýrstar uıymdastyrýǵa shaqyrady.
Deklaratsııa sońynda shara qatysýshylary Qazaqstan Respýblıkasynyń Úkimetine mańyzdy bastamalar men qonaqjaılylyq úshin jáne Astanadaǵy Konferentsııany sátti ótkizgeni úshin alǵys aıtty jáne Aýǵanstandaǵy áıelderdiń quqyqtary men múmkindikterin keńeıtý týraly kelesi Óńirlik konferentsııany 2019 jyldyń qyrkúıeginde ótkizý týraly qaýly shyǵardy.
