Astanada Aýǵanstan áıelderine arnalǵan konferentsııa ótedi

ASTANA. QazAqparat - QR Syrtqy ister mınıstrliginiń Aýǵanstan boıynsha arnaıy ókili, Erekshe tapsyrmalar jónindegi elshi Stanıslav Vasılenko bastaǵan Qazaqstan delegatsııasy BUU Qaýipsizdik Keńesiniń Aýǵanstan máseleleri týraly otyrysyna qatysty, dep habarlaıdy QazAqparat QR SІM baspasóz qyzmetine silteme jasap.

Qaýipsizdik Keńesiniń músheleri Aýǵanstaǵy jaǵdaıǵa baǵa beretin jáne bul elge kómektesý boıynsha BUU ókildiginiń mandatyn taǵy bir jylǵa uzartatyn 2405 qararyn qabyldady.

Otyrysqa qatysýshylar 2018 jyldyń qańtar aıynda BUU Qaýipsizdik Keńesi músheleriniń Qazaqstan tóraǵalyǵymen Aýǵanstanǵa saparyn joǵary baǵalady, bul sapar eldegi jaǵdaıǵa tereńirek úńilýge múmkindik bergen. Odan bólek, 19 qańtar kúni BUU QK Qazaqstannyń jetekshiligimen uıymdastyrylǵan «Qaýipsizdik pen damýdyń ózara táýeldilik úlgisi retinde Aýǵanstan men Ortalyq Azııada aımaqtyq seriktestik qurý» kezdesýiniń de mańyzdy ári tıimdi bolǵany atalyp ótti.

Óz sózinde S.Vasılenko Aýǵanstan tap bolyp otyrǵan saıası jáne ekonomıkalyq máseleler, qaýipsizdikke tóngen qater óńir elderiniń, halyqaralyq qaýymdastyqtyń jáne Qaýipsizdik Keńesiniń turaqty qoldaýyn talap etedi. Eldegi shıelenisterdi sheshýde jastarmen qatar áıelderdiń de mańyzdy ról oınaıtynyn jetkizdi. Osyǵan qatysty, 2018 jyldyń kúzinde Astanada «Aýǵanstandaǵy áıelder úshin múmkindikterdi keńeıtý» halyqaralyq konferentsııasyn uıymdastyrý josparlanýda.

«Bizdiń elimiz Eýropalyq odaq pen ózge seriktesterdiń ortaq qarjylandyrýymen aýǵan azamattaryna bilim berý baǵdarlamasyn jalǵastyrý bastamasyn kóterdi. Bizdegi quny 50 mıllıon dollar bolatyn bilim berý baǵdarlamasy aıasynda 2010-2021 jyldary Qazaqstan JOO-larynda myńǵa jýyq Aýǵanstan azamattary bilim alady», - dedi S. Vasılenko.

Qazirgi ýaqytta Eýropalyq odaq BUU «UN Women» uıymymen birlese júzege asyratyn, elimizde aýǵan qyzdaryn oqytýǵa baǵyttalǵan ortaq jobanyń alǵashqy kezeńin qarjylandyrýǵa kirisken.