Astanada Aýǵan soǵysy múgedekterine jáne maıdanda qaza tapqan bozdaqtardyń analaryna 100 myń teńgeden berildi
ASTANA. 18 shilde. QazAqparat - Astanada Aýǵan soǵysynyń birinshi jáne ekinshi toptaǵy múgedekteri men sol maıdanda qaza tapqandardyń otbasylaryna arnalǵan qamqorlyq sharasy ótti.
Aktsııa barysynda Aýǵan soǵysynyń múgedekterine jáne soǵysta qaza tapqan jaýyngerlerdiń ata-analaryna 100 myń teńgeden aqshalaı kómek berildi. Sharany ótkizýge demeýshiler qolushyn bergen.
Astana qalasy «Aýǵan soǵysynyń múgedekteri men ardagerleri odaǵy» qoǵamdyq birlestiginiń tóraǵasy Muratbek Ámirjanovtyń aıtýynsha, Astanada uldaryn Aýǵan soǵysynda joǵaltqan osyndaı 12 ana men 1 áke bar.
«Búgingi tańda elordada 1,3 myńnan astam ardager turady. Surapyl soǵys kezinde 17 jas jaýynger qaza tapty. Olar túlep ushqan mektepterde olardyń qurmetine memorıaldy taqtalar ornatyldy», - dep atap kórsetti ol.
Aýǵan soǵysyna Qazaqstannan 22 myńnan astam sarbaz qatysyp, 924 bozdaq ajal qushty. Al 21-i iz-tússiz joǵalyp ketti.
