Astanada aýdaryspaqtan halyqaralyq týrnır jeńimpazdary anyqtaldy
ASTANA. QazAqparat - Elordadaǵy «Qazanat» ıppodromynda jalpy júlde qory 5 mıllıon 200 myń teńgeni quraıtyn aýdaryspaqtan halyqaralyq týrnır óz máresine jetti, dep habarlaıdy QazAqparat.
QR Ulttyq sport túrleri qaýymdastyǵynyń habarlaýynsha, tórt salmaq dárejesinde ótkizilgen baıraqty básekeniń bas júldesin otandastarymyz óz qanjyǵasyna baılaǵan.
17 tamyz kúni 80, 90 jáne 90 keliden joǵary salmaq dárejesinde júldeler sarapqa salyndy.
80 keli sportshylar arasynda qazaqstandyq Esimhan Rahmatilla jeńimpaz atandy, Monǵolııanyń Baıan-Ólgeı aımaǵynyń bas balýany Jeńisbek Serikuly - ekinshi oryndy, qytaılyq qandasymyz Muqat Qýanyshuly úshinshi oryndy ıelendi.
90 keli salmaq dárejesindegi beldesýde, el namysyn qorǵaǵan Syrym Іzbasarov - bas júldeni, monǵolııalyq qandasymyz Baqytbek Aqbı - «kúmisti», qyrǵyzstandyq Maratbek Altymyshev qola júldeni jeńip aldy.
90 keliden joǵary salmaqta otandasymyz Birjan Qosalıev qarsylas shaq keltirmedi. Al Kúmis júldeni Qytaı komandasynyń balýany Serik Úsen, qola júldeni Monǵolııalyq Dosjan Baıys jeńip aldy.
18 tamyz - týrnırdiń ekinshi kúninde «túıe balýan» salmaq dárejesindegi beldesýler ótti. Bul sanatta 5 memlekettiń - Qazaqstan, Qytaı, Mońǵolııa, Reseı jáne Majarstannyń 18 sportshysy baq synady. Nátıjesinde, qazaqstandyq Birjan Qosalıev jeńiske jetip, týrnırdiń bas júldesi «túıe balýan» belbeýine ıe boldy.
Aıta keteıik, týrnırdiń jeńimpazdaryn marapattaý rásimine QR Ulttyq sport qaýymdastyǵynyń prezıdenti Bekbolat Tileýhan qatysty. 80, 90 jáne 90 keliden joǵary salmaq sanattaryndaǵy jeńimpazdarǵa - 700 myń, ekinshi jáne úshinshi oryndarǵa, sáıkesinshe 500 jáne 200 myń teńge kóleminde syıaqy berildi. «Túıe balýan» ıegeri Birjan Qosalıevqa 1 mıllıon teńge tabystaldy.
