Astanada aýdaryspaqtan alǵashqy Azııa chempıonaty ótti (FOTO)
ASTANA. QazAqparat - Búgin, 15 maýsymda Astanadaǵy «Qazanat» ıppodromynda tuńǵysh ret Aýdaryspaqtan І ashyq Azııa chempıonaty ótti.
Sharanyń ashylý saltanatynda sóz sóılegen «Nur Otan» partııasy Tóraǵasynyń birinshi orynbasary Baýyrjan Baıbek oıyn kórermenderin aıtýly oqıǵamen quttyqtaı otyryp, mundaı ulttyq sport túrin damytýdyń mańyzdylyǵyn aıryqsha atap ótti.
Baıraqty básekede 11 memlekettiń 33 sportshysy - Qytaı, Reseı, Túrkııa, Vengrııa, Aýǵanstan, Qyrǵyzstan, Tájikstan, Ózbekstan, Ázerbaıjan, Mońǵolııa jáne Qazaqstannyń at qulaǵynda oınaıtyn, sańlaq sportshylar qatysyp, baqtaryn synady.
Chempıonat 70 kelige, 90 kelige deıin jáne 90 keliden joǵary salmaq dárejeleri boıynsha sarapqa salynyp, júlde alǵan balýandar absolıýtti chempıony ataǵyna talasty.
Bul - salt attylardyń birin-biri er ústinen aýdaryp alýǵa tyrysatyn qazaqtyń ejelgi ulttyq sport túriniń biri. At ústinde kúrese bilý úshin sportshydan atty jaqsy meńgerýimen qosa, úlken kúshtilik, eptilik, tózimdilik pen batyldylyq talap etiledi.
Aıta keteıik, oıyn kórsetilimin 16-17 maýsymda « KAZsport » telearnasy efırinen 21.00-de tamashalaýǵa bolady.
Týrnırdi uıymdastyrýshylar - QR Ulttyq sport túrleri qaýymdastyǵy men QR Sport jáne dene shynyqtyrý isteri agenttigi. Bas demeýshi «Samuryq-Qazyna» Ulttyq ál-aýqat qory, al qoldaýshylar: «Nur Otan» partııasy jáne «EXPO-2017» halyqaralyq kórmesi.
