Astanada aýdan ákimi borandy kúnde qaıyrymdy bolýǵa shaqyrdy
ASTANA. QazAqparat - Astananyń Saryarqa aýdanynyń ákimi Arman Turlybek elordalyqtardy qolaısyz aýa raıy jaǵdaıynda bir-birine kómektesýge shaqyrdy, dep habarlaıdy «QazAqparat» HAA tilshisi.
«Qurmetti turǵyndar! Qolaısyz aýa raıy kezinde bir-birimizge qaıyrymdy bolaıyq, kómekteseıik. Aq tútek borannan jolda júre almaı turǵandardy, mashınasy omby qarǵa batyp qalǵandardy kórseńizder toqtap, kómektesińizder, keń peıil bolaıyq», - dep jazdy ol Facebook-tegi eki qyzdy boran ushyryp kete jazdaǵan sáttiń vıdeosyna pikir bildirip.
«Ábden ashýǵa býlyǵyp otyrmyn. Eki er adam mashınada vıdeoǵa túsirip otyr, shyǵyp kómek berýdi tipti oıyna da almaıdy. Erinbegender vıdeoǵa án jazǵanyn qarańyzdarshy», - deıdi Arman Turlybek.
Buǵan deıin Astana ákimi Áset Isekeshev aýa raıynyń kúrt quıýylýyna baılanysty elordalyq kólik júrgizýshilerine óz baǵdaryn aldyn ala josparlap júrýge keńes bergen bolatyn.
«Aýa raıy jaǵdaıyna baılanysty qala turǵyndary men meımandaryna qozǵalys baǵdaryn aldyn ala josparlap alýǵa, jol erejelerin saqtaýǵa jáne jolda abaı bolýǵa shaqyramyz. Qaýipsiz jyldamdyqpen júrgen abzal», - deıdi qala ákimi Feısbýk paraqshasynda.
Qazgıdromet aldaǵy úsh kúnde Qazaqstannyń ortalyǵynda qarly borannyń saqtalatynyn habarlaǵan bolatyn.
QR Іshki ister mınıstri Qalmuhanbet Qasymov Astanadan shyǵatyn barlyq baǵyttar boıynsha avtokóliktiń barlyq túri úshin joldar jabylǵanyn aıtqan bolatyn. Budan tys, Aqmola, Qaraǵandy, Pavlodar, Qyzylorda oblystarynda da joldar jabylǵan. Onyń sózine qaraǵanda, joldardyń bárinde baqylaý beketteri, jol-patrýl polıtsııasy, jol qyzmetteri ornalastyrylyp, TJK qutqarýshylary jumys júrgizip jatyr. «Jaǵdaıdy baqylap otyrmyz, turǵyndarǵa aýa raıy týraly habar úzilissiz berilip jatyr», - dedi ol.
Eske sala ketsek, qarly-borandy aýa raıyna baılanysty Astanada qoǵamdyq kólik kestesi ózgerdi.
