Astanada aýdan ákimderiniń eseptik kezdesýleri ótip jatyr
ASTANA. QazAqparat - 19 qańtarda aýdan ákimderiniń halyqpen dástúrli túrde esep berý kezdesýi bastaldy.
Osy kúni «Esil» aýdanynyń ákimi Ermaǵanbet Bólekpaev eń aldymen «BI Group» eńbek ujymymen kezdesýden bastady, dep habarlaıdy elorda ákimdiginiń resmı saıty.
«BI Group» 250-den asa qyzmetkeri № 76 mektep-lıtseıge «Esil» aýdanynyń ákimimen kezdesýge jınaldy. Jıynǵa kommýnaldyq qyzmet, merdiger uıymdar, Astana ákimdigi basqarmasynyń basshylary, aýdannyń memlekettik qurylymyndaǵy ókilderi de qatysty.
Eseptik kezdesý barysynda aýdan basshysy ótken jyldyń áleýmettik-ekonomıkalyq damý qorytyndysy men 2018 jylǵy basty tapsyrmalaryn baıandap ótti. Aýdannyń tazalyq máselesi, jol-transport ınfraqurylymy, joldardy jóndeý, qurylys, jolaýshylar tasymaldaý, kásipkerlik, áleýmettik sala, densaýlyq, bilim salasynyń qorytyndylary shyǵaryldy.
«Esep berý kezeńine deıin «Esil» aýdany ákiminiń apparatyna turǵyndardan 10 myńnan asa aryz-shaǵym kelip túsken. Bul ótinishterdiń bári de aýdan basshylyǵynyń jeke qabyldaýyna, qala, aýdan ákimdiginiń resmı ınternet-resýrstarynda qabyldandy. Sondaı-aq, elimizdiń tsıfrlyq kezeńge aıaq basýyna oraı, turǵyndar ótinish, shaǵymdaryn saıt pen áleýmettik jeliler arqyly da bere bastady. Qysqasy, barlyq shaǵym, aryzdar boıynsha is-shara qoldanyp, túsinikteme berildi. Sonymen birge, kún saıyn turǵyn úı kesheni men alaptarynyń bastamashyl toptarymen kezdesý ótkizip, kóptegen másele sheshimin tapty. Bul jumys ary qaraı da jalǵasyn tabady», - dedi E.Bólekpaev.
«Esil» aýdanynyń halyq sany 189 myń 330 adam, bul ótken jylmen salystyryp qaraǵanda 21% kóp, ıaǵnı aýdan qurylǵaly turǵyndar sany úsh esege kóbeıgen.
Eseptik kezdesýdiń qorytyndysyn shyǵarǵan Ermaǵanbet Bólekpaev júrgizilgen jumystardyń barlyǵy da alǵa qoıǵan tapsyrmalardy sheshýge jáne áleýmettik-ekonomıkalyq ahýaldy turaqtandyrýǵa baǵyttalǵandyǵyn aıtty.
Eseptik kezdesýden keıin qatysýshylar tikeleı aýdan ákimine suraq qoıýǵa kóshti. Onda aýdandy kóriktendirý máselesi men aýla terrıtorııasy týraly suraq qozǵaldy.
Turǵyndar kezdesýde qardy der kezinde syrtqa shyǵarý, kóshelerdi jaryqtandyrý, aýla terrıtorııasyn abattandyrý, joldardy jóndeý, aýdannyń balansyna qarasty aýlalardy jaryqtandyrý máselesin kóterdi.
Aýdan ákimi qatysyp otyrǵandarǵa qoıylǵan suraqtardyń bári baqylaýǵa alynyp, tıisti qalalyq basqarmalarǵa jóneltetinin jáne múmkindiginshe sheshetinin aıtty.
Aıta keteıik, aýdan basshylarynyń halyqpen esep berý kezdesýleri bastaldy, ol 2018 jyldyń 2 aqpanyna deıin jalǵasady.
