Astanada aýany lastaǵan 100-den astam kólik ıesine aıyppul salyndy
NUR-SULTAN. QazAqparat - Elordalyq polıtseıler avtokólikterdiń qalanyń atmosferalyq aýasyna áserin tekserdi, dep habarlaıdy QazAqparat.
Polıtsııa departamenti Nur-Sultan qalasynyń qorshaǵan ortany qorǵaý jáne tabıǵatty paıdalaný basqarmasymen jáne «Ekoservıs-S» JShS birge yntymaqtastyq týraly memorandýmǵa qol qoıdy.
Qujattyń maqsaty - Nur-Sultan qalasynyń qorshaǵan orta sapasyn arttyrý jáne ekologııalyq problemalaryn sheshý máseleleri boıynsha yntymaqtastyq ornatý.
Polıtseıler ekologtarmen birlese otyryp, avtokólikterdiń qalanyń atmosferalyq aýasyna zııandy áserin azaıtý úshin paıdalanylǵan gazdyń ýyty men tútininiń normalarǵa sáıkestigin tekseredi.
Kólik quraldaryn arnaıy quraldarmen jáne jabdyqtarmen jaraqtandyrylǵan jyljymaly ekologııalyq beketter tekseredi.
Oqytylǵan ekolog-operatorlar avtokólik quraldary paıdalanǵan gazdy ólshep, alynǵan derekterdi bastapqy kezeńde óńdeıdi.
Qalanyń atmosferalyq aýasyna zııandy áserdi tómendetý maqsatynda reıd kezinde 354 kólik quraly tekserildi.
Tekserý nátıjesinde gaz shyǵarý normalaryn buzǵan 100-den astam avtokólik anyqtalyp, ákimshilik jaýapkershilikke tartyldy.
QR ÁQBtK 334-babyna sáıkes avtokólik jáne basqa da jyljymaly quraldardy paıdalaný lastaýshy zattar men shyǵaryndylardyń bolýy normatıvten asyp ketse, jeke tulǵalar - 10 AEK, al zańdy tulǵalar - 100 AEK aıyppul tóleıdi.
