Astanada aýa raıyna baılanysty áýe reısteri keshigip jatyr

ACTANA. KAZINFORM – Aýa raıynyń qolaısyzdyǵyna baılanysty Astana áýejaıynda reıster keshigip jatyr.

Onlaın ushý taqtasyndaǵy málimet boıynsha, keshiktirilgen reısterdiń qatarynda ishki reıster de bar. Mysaly, Óskemen, Qyzylorda jáne Atyraýdan keletin reıster keshikken.

Air Astana kompanııasy da birneshe reıstiń keshiktirilgenin habarlady. Kompanııa Astanadan ushatyn reısterdiń aýa raıyna baılanysty keıinge qaldyrylyp jatqanyn atap ótti.

Jolaýshylarǵa áýejaıǵa attanar aldynda áýe kompanııasynyń resmı saıtyndaǵy reıs týraly aqparatty oqý usynylady.

Buǵan deıin Almaty halyqaralyq áýejaıynda qolaısyz aýa raıy saldarynan ushý kestesi buzylyp jatqanyn jazǵan bolatynbyz.