Astanada atyshýly oqıǵadan soń barlyq lıft kompanııalary tekseriletin boldy
ASTANA. QazAqparat - Astana ákimi dúısenbi kúni qalalyq ákimdikte ótken keńeste barlyq lıft sharýashylyǵynyń tıisti mamandary men qarjylandyrýdyń bary-joǵyn tekserýdi tapsyrdy, dep habarlaıdy Elorda.info.
Mundaı sheshim «Edem palas-2» TK lıftilerinde bolǵan eki oqıǵadan keıin shyǵarylyp otyr.
«Aýdan ákimi men turǵyn úı ınspektsııasynyń, basqarýshy kompanııanyń basshysy birden oqıǵa bolǵan jerge kelýi tıis edi. Máseleni kóterip, sheshim qabyldaýy qajet edi. Kisi ólimi bolsa ne bolar edi? Buǵan sizderdiń eshqandaı da qatystaryńyz joq pa?» - dep keıidi Áset Isekeshev turǵyn úı ınnspektsııasy basshylyǵyna.
Osyǵan baılanysty qala ákimi óziniń birinshi orynbasary Andreı Lýkınge prokýratýramen birlesip elordadaǵy barlyq lıfttik kompanııalardyń jumysyn tekserýdi tapsyrdy.
«Prokýratýramen birge barlyq lıfttik kompanııalardyń mamandarynyń, qarajatynyń bar-joǵyn tekserip shyǵý qajet. Birinshi kezekte adamdar týraly oılaý kerek», - dedi Á.Isekeshev.
Astana ákimi on kún ishinde lıfttik kompanııalardyń jumysyna taldaý júrgizýdi tapsyrdy.
Eske sala keteıik, 13 sáýirde «Edem palas-2» turǵyn úı kesheninde kishkentaı balany qosqanda barlyǵy jeti adam mingen lıft altynshy qabattan qulap túsken bolatyn. Abyroı bolǵanda, eshkim zardap shekken joq: qutqarýshylar alty eresek adam men 8 jasar mektep oqýshysyn tótenshe ýaqıǵadan tek bir saǵat ótken soń ǵana qutqaryp alǵan.
21 sáýirde dál sol turǵyn úı kesheninde úıdiń bir turǵyny mingen lıft 17 qabattan qulady. Qosymsha arqan ǵana qurylǵyny 8 qabatta toqtatýǵa múmkindik bergen.
