Astanada Atyrau Creative Days jármeńkesi ashyldy
ATYRAÝ. KAZINFORM – Elordada Atyraý oblysynyń shyǵarmashylyq ókilderi óz jumystaryn tanystyratyn Atyrau Creative Days jármeńkesi ashyldy.
Jármeńkege Atyraý oblysy ákiminiń orynbasary Marat Mýrzıev pen QR Mádenıet jáne aqparat vıtse-mınıstri Evgenıı Kochetov qatysty. Qonaqtar jármeńke alańyn aralap, shyǵarmashylyq ókilderdiń jumystarymen tanysty.
Sharanyń ashylý baǵdarlamasy «Sarmad» etno-folklorlyq ansambliniń ónerimen bastalyp, Atyraý jastar teatrynyń mýzykalyq baǵdarlamasymen jalǵasty.
– Jármeńkede Atyraýdyń óneri, dızaıny, qolóneri men kreatıvti jobalary elorda turǵyndary men qonaqtaryna usynylyp otyr, – delingen shara týraly málimette.
Baǵdarlamanyń sán bóliginde Atyraý oblysynan arnaıy kelgen dızaınerler avtorlyq kıim toptamalaryn defıle formatynda kópshilik nazaryna usyndy.
Atyrau Creative Days jármeńkesi erteń de jalǵasady. Kelýshiler Atyraýdyń óneri, dızaıny, qolóneri jáne kreatıvti jobalarymen jaqynyraq tanysyp, unaǵan buıymdaryn tikeleı avtorlarynan satyp ala alady.
