Astanada atty patrýl qoǵamdyq tártipti qorǵaıdy
ASTANA. QazAqparat - Astana qalasynyń ІІD jol-patrýldik polıtsııa polkiniń kavalerııalyq vzvody qalanyń shetinde, saıajaılar men saıabaq aýmaqtarynda kún saıyn reıd ótkizedi. Atqa mingen tártip saqshylary patrýldik mashınalar óte almaıtyn jerlerde qyzmet atqarady, dep habarlaıdy elorda ákimdiginiń baspasóz qyzmeti.
Astanadaǵy atty polıtsııa 1992 jyly quryldy. Osy kúnge deıin kóptegen ákimshilik buzýshylyqtar men aýyr qylmystar ashyldy. Jyl basynan beri atty polıtsııamen 700 jýyq buzýshylyq tirkeldi.
Polıtseıler jumysyna tańǵy 7-den bastap daıyndalady, attaryn tazalap, tamaqtandyrady. Kún saıyn atqa mingen 12 qyzmetker jumysqa shyǵady, belgilengen marshrýtty 2 polıtseı patrýldeıdi.
At qoradaǵy 80 jylqynyń tuqymy ártúrli - ahalteke, býdennyı, aǵylshyn, qostanaı jáne t.b. Ár qyzmetkerge 2 attan keledi
Polıtsııanyń kishi serjanty Erkebulan Ahmetkárimovtiń atty polıtsııada istegenine bir jyldan asty. Osy ýaqyttyń ishinde ol 128 ákimshilik hattama toltyrǵan.
- Organdarda qyzmet etýdi kishkentaıymnan armandaǵam, meniń aǵalarym da organdarda isteıdi, Men solardyń jolyn qýmaq boldym. Atty polıtsııa týraly alǵash ret taǵylymdamadan ótkende bildim. Bala kezimde atpen júretinmin, balalyq shaǵymdy eske túsirgim keldi, - deıdi ol.
Erkebulannyń aıtýynsha, bul jumystaǵy eń basty nárse - atpen baılanys ornata bilý. Keıipkerimiz marshrýtqa serikteri Raketamen jáne Kaskadpen shyǵady.
- Jylqy - sezimtal janýar, eger adam attan qoryqsa, ol ony jolatpaıdy. Al kerisinshe, qoryqpaı, sıpap, oǵan kútim kórsetseń, bári de jaqsy bolady, baılanys ornaıdy.
Men attardy jaqsy kóremin, jandarynda júrgendi unatamyn,- deıdi tártip saqshysy.
Atpen patrýldeý tek jyly kezde ǵana júrgiziledi, qysta reıdter jaıaý júzege asyrylady. Attar orta eseppen 18-20 jyl boıy qyzmet etedi.
