Astanada atpen serýendegen er adamǵa aıyppul salyndy
ASTANA. KAZINFORM — Astanada áleýmettik jelige beınerolık túsirý úshin atpen avtomobıl joly men trotýarda júrgen 35 jastaǵy er adam ákimshilik jaýapkershilikke tartyldy. Bul týraly elorda ákimdigi málim etti.
35 jastaǵy er adam elordadaǵy oıyn-saýyq oryndarynyń birine beınerolık túsirý maqsatynda atpen avtomobıl jolymen jáne jaıaý júrginshilerge arnalǵan trotýarlarmen júrip, jaıaý júrginshilerdiń qozǵalysyna kedergi keltirgen.
Keıin «Báıterek» monýmenti mańyna qaraı bet alǵan kezde, jol qıylystarynyń birinde jylqy trotýardy lastap, jasyl jelekterge zaqym keltirgen. Osylaısha abattandyrý salasyndaǵy zańnama talaptary buzylǵan.
Atalǵan eki quqyq buzýshylyq faktisi boıynsha er adam ákimshilik jaýaptylyqqa tartyldy.
Astana qalasynyń Polıtsııa departamenti qala turǵyndary men qonaqtaryn Qazaqstan Respýblıkasy zańnamasynyń talaptaryn saqtaýǵa, aınalasyndaǵylardyń quqyqtaryn qurmetteýge jáne jol qozǵalysynyń basqa qatysýshylary men jaıaý júrginshilerge qolaısyzdyq nemese qaýip tóndiretin áreketterge jol bermeýge shaqyrady.
Aıta keteıik, buǵan deıin Astanada er adamnyń ústinen polıtsııaǵa bir kúnde úsh shaǵym tústi.
