Astanada ataýly kólik kartalaryn alý merzimi uzartyldy
ASTANA. QazAqparat - Astana ákimi Áset Isekeshev jeńildik sanatyndaǵy azamattardyń ataýly kólik kartasyn alý merzimin 1 shildege deıin uzartty, dep habarlaıdy QazAqparat tilshisi «Astana LRT» baspasóz qyzmetine silteme jasap.
«Jeńildik sanatyna enetin azamattardyń ataýly kólik kartalaryn alý merzimi uzartyldy. Buryn, qalalyq baǵdarlar men júrdek avtobýstarda zeınetaqy kýálikterin kórsetip, tegin júrý quqyǵyn paıdalaný merzimi 2018 jylǵy 1 maýsymǵa deıin uzartylǵan bolatyn», - dep málimdedi uıymnyń baspasóz hatshysy Naýat Azanbaeva Feısbýktegi paraqshasynda.
Ol qoǵamdyq kóliktegi elektrondy tólem júıesiniń engizilýine baılanysty, Astanada tirkelgen jeńildik sanatyndaǵy azamattar tegin júrýge arnalǵan ataýly kólik kartalaryn alýy tıis ekendigin eske saldy. Elektrondy júıe 2018 jylǵy 1 qańtardan bastap qalanyń barlyq avtobýstaryna ornatyldy. Qoǵamdyq kólikti tegin paıdalaný úshin, jeńildik sanatyndaǵy azamattar ataýly kólik kartalaryn ala júrýi qajet.
«Búgingi tańda jeńildigi bar kólik kartalaryn 88 myńǵa jýyq adam alǵan. Sonymen qatar jeńildik sanatyndaǵy 28 myń azamat ataýly kólik kartalaryn áli alǵan joq. Osyǵan baılanysty, Astana ákimi Áset Isekeshev ataýly karta alý merzimin 2018 jylǵy 1 shildege deıin uzartty. Bul merzim qaıta uzartylmaıdy», - dedi ol.
Jeńildik sanatyndaǵy azamattar kólikte qaǵaz zeınetaqy kýáligin kórsetý arqyly taǵy da bir aı tegin júre alady.
«Sondyqtan azamattardy bir aıdyń ishinde ataýly kólik kartalaryn alýǵa shaqyramyz. Ol úshin «Astana LRT» JShS resmı saıtynda onlaın túrde ótinish berip, jaýap kelgen soń kartany Qajymuqan kóshesi, 14-úıde ornalasqan arnaýly kassadan alý qajet. Qoǵamdyq kólik paıdalanýshylary qajetti aqparattardy alý úshin «Astana LRT» baılanys ortalyǵyna 574-777 nómiri arqyly júginýine bolady», - dep jazdy N. Azanbaeva.
