Astanada ataýly áleýmettik kómek alatyn otbasylar sany 2,2 ese artady

ASTANA. QazAqparat - 1 sáýirden bastap shamamen 2,5 myń astanalyq otbasy osyndaı kómekpen qamtylady, dep habarlaıdy QazAqparat qala ákimdiginiń resmı saıtyna silteme jasap.

Qalalyq jumyspen qamtý jáne áleýmettik qorǵaý basqarmasynda belgili bolǵandaı, Astanada ataýly áleýmettik kómek (AÁK) alatyn otbasylar sany edáýir artady.

«Elordada 1 sáýirden bastap ataýly áleýmettik kómek alýshylar sany 2,2 esege artyp, 2500 otbasyny quraıdy. Otbasy quramy - orta eseppen tórt-bes adam», - dep habarlady vedomstvodan.

AÁK alýshylardyń negizgi bóligin tolyq emes jáne kópbalaly otbasylar quraıdy. AÁK alýshylar jumyspen qamtý ortalyǵyna (Beıbitshilik kóshesi, 25) baryp nemese myna baılanys telefondary arqyly habarlasa alady: Almaty aýdany, tel: 72 93 57, Saryarqa aýdany, tel: 72 93 31, Baıqońyr aýdany, tel: 72 93 38, Esil aýdany, tel: 72 83 38.