Astanada ataqty kúıshi Beısenbi Dónenbaıulynyń shyǵarmashylyǵyna arnalǵan kesh ótedi
ASTANA. QazAqparat - Búgin Astanadaǵy «Astana kontsert zalynda» XIX ǵasyrda qytaıdyń Altaı aımaǵy Býyrshyn aýdanynda ómir súrgen ataqty bı ári belgili kúıshi Beısenbi Dónenbaıulynyń shyǵarmashylyǵyna arnalǵan «Ádil bı, tarlan kúıshi» atty kontsert ótedi, dep habarlaıdy QazAqparat tilshisi.
Astana qalasy fılarmonııasy «Saryarqa» ansambliniń kórkemdik jetekshisi Erjan Toqsabanovtyń aıtýynsha, óner ujymy Beısenbiniń kúılerin on jyldan beri tyńdarmandaryna usynyp kele jatyr. Olardyń qorjynynda qazirgi ýaqytta áıgili kúıshiniń jıyrmadan astam kúıi bar. Bir ansambl qorynda bir kúıshiniń jıyrmadan astam kúıi bolýy bul jaıdan jaı emes, ol degenimiz Beısenbi Dónenbaıuly kóptiń biri emes ekenin kórsetedi.
«Osy jolǵy Bejeńniń «Ádil bı, tarlan kúıshi» atty shyǵarmashylyq keshin ótkizýge eń áýeli muryndyq bolǵan Astana qalasy ákimdigine qarasty Memlekettik akademııalyq fılarmonııasynyń basshylyǵy», - deıdi «Saryarqa» ansambliniń sybyzǵyshysy Shyǵys Maqanuly.
«Bizdiń basty josparymyz - Beısenbi Dónenbaıulynyń mol mádenı muralary ustaǵannyń qolynda, tistegenniń aýzynda ketpeýdi maqsat tutyp, osyndaı qolda bar oraıly sátter arqyly, eki ǵasyrdan astam ýaqyt ótse de el esinde jattalyp kelgen týyndylardy jalpaq jurtqa jarııa etý bolatyn», - deıdi sybyzǵyshy Sh. Maqanuly.
«Bul jerde men nege «ustaǵannyń qolynda, tistegenniń aýzynda» dep otyrmyn», - dep jalǵady sózin sybyzǵyshy Shyǵys Maqanuly. - Sońǵy tórt, bes jylda Bejeńniń kúılerin keıbir sazgersymaqtar óz qanjyǵalaryna baılap, talan-tarajǵa túsip, tonalyp jatqanyn kórip, óner adamy retinde júregim aýyryp, qatty ýaıymdap júrmin. Bejeńniń kúılerin el nazaryna jetkizý, keıingi jas urpaqqa dáripteýge osy ýaqytqa deıin eshkim áreket jasamaǵan soń, osylaı basshylarymyzdyń qoldaýymen, ózimiz ujym bolyp qolǵa alýǵa týra keldi. Osy keshti ótkizýdegi basty maqsatymyz - budan eki ǵasyrǵa jýyq buryn ómir súrse de, bı retindegi ádildigi, kúıshi retindegi daryndylyǵy el aýzynan áli kúnge qalmaı kele jatqan tarlan kúıshiniń kúılerin tozdyrmaý. Eger osy keshimiz sátti ótip, kóp kórermendi tarta alsaq, onda kúıshi babamyzdyń aldyndaǵy paryzymyzdy ótegen bolar edik», dep túıindedi ol sózin.
Aıta ketý kerek, Beısenbi Dónenbaıuly (1803-1872) Qytaıdyń Altaı aımaǵy, Býyrshyn aýdanynda týǵan. Sol dáýirdegi Altaıdaǵy áıgili tórt bıdiń biri bolǵan. Ádil bıligimen, asqan dombyrashy, sazgerligimen halyqqa keńinen tanylǵan. Beısenbi kúıleri qytaı qazaqtary arasynda, Mońǵolııa, Shyǵys Qazaqstan óńirlerinde keńinen taraǵan. Atalǵan keshte búgingi kúnge 147 kúıi jetip otyrǵan Bejeńniń 20-dan astam týyndysy ansamblde, arnaıy dombyra, narqobyz, sybyzǵy, adyrna syndy aspaptarda oryndalady.
Atalǵan kesh saǵat 17:00-de bastalady.
