Astanada at sportynan Konstıtýtsııanyń 30 jyldyǵyna arnalǵan jarys ótip jatyr
ASTANA. KAZINFORM – Elorda irgesindegi «Arǵymaq» at sporty-saýyqtyrý kesheninde Konstıtýtsııanyń 30 jyldyǵyna arnalǵan at sportynyń qalalyq ashyq chempıonaty jalaýyn jelbiretti, dep habarlaıdy elorda ákimdiginiń resmı saıty.
Aýqymdy dodaǵa Astanadan jáne Qaraǵandy oblysynan kelgen 80-nen astam shabandoz qatysyp, sáıgúlikterimen birge sheberlikterin synap jatyr. Tańǵy samalmen bastalǵan jarys barysynda sportshylar 12 túrli marshrýt boıynsha baq synaıdy.
– Bul chempıonat – elorda jurtshylyǵyn sportqa baýlýymen qatar, táýelsizdik qundylyqtary men Konstıtýtsııanyń mártebesin dáripteýge baǵyttalǵan. At sportyna arnalǵan bul ashyq chempıonattyń maqsaty – ulttyq olımpıadalyq sport túrlerin damytý, jasóspirimder men jastardy salaýatty ómir saltyna baýlý, sondaı-aq jylqy mádenıetin dáripteý. Sonymen birge jarys arqyly sportshylardyń tájirıbesin shyńdap, elimizdiń at sporty salasyna jańa esimderdi tartý kózdelgen. Chempıonat jeńimpazdary men júldegerleri keshkisin saltanatty túrde marapattalmaq, - deıdi «Arǵymaq» at sporty-saýyqtyrý kesheniniń basshysy, at sportynyń olımpıadalyq túrlerinen memlekettik jattyqtyrýshy Amanjol Hasenov.
Aıta keteıik, atalmysh is-shara Astana qalasy ákimdiginiń qoldaýymen, sondaı-aq qalalyq Ulttyq jáne olımpıadalyq at sporty túrleri federatsııasynyń uıymdastyrýymen ótip jatyr.
Eske sala keteıik, buǵan deıin Atyraý qalasyndaǵy Aqsaı atshabarynda QR Konstıtýtsııasynyń 30 jyldyǵyna arnalǵan respýblıkalyq at báıgesi ótkenin jazǵan edik.