Astanada at sportynan aýqymdy jarystar ótedi

ASTANA. KAZINFORM - 30 mamyr 1 maýsym aralyǵynda Astana qalasynda «Arǵymaq» at-sporttyq saýyqtyrý kesheni bazasynda aýqymdy halyqaralyq jarystar – konkýrdan Eýrazııalyq Lıganyń Álem Kýbogynyń kezeńi (FEI CSI 1*-W) jáne Atpen mánerlep júrý boıynsha halyqaralyq týrnır (FEI CDI 1*) ótedi.

QR At sporty federatsııasy baspasóz qyzmetiniń habarlaýynsha, jarysqa alys jáne jaqyn shetelden alty eldiń myqty qurama komandalary qatysady. Іs-shara halyqaralyq standarttarǵa sáıkes Halyqaralyq at sporty Federatsııasynyń (FEI) qoldaýymen ótkiziledi.

Úsh kún ishinde 60-tan asa úzdik sportshy ártúrli kedergilerden turatyn marshrýttar men atpen júrýden óz sheberlikterin kórsetedi.

Konkýr – ol jylqynyń jáne shabandozdyń kedergilerden ótý qabiletin anyqtaıtyn olımpıadalyq sport túri. Maqsat – qashyqtyqty qateliksiz ári múmkindiginshe qysqa ýaqyt ishinde eńserý.

Atpen mánerlep júrý – at sportynyń joǵary deńgeıi, munda shabandoz ben at arnaıy arenada dáldikpen jáne úılesimdilikpen túrli qımyldardy oryndaıdy.

Astanada Álem Kýbogynyń kezeńin Qazaqstanda ótkizý at sportyna degen qyzyǵýshylyqtyń artyp kele jatqanyn kórsetedi. Bul – tek el úshin ǵana emes, barlyq at sporty jankúıerleri úshin mańyzdy sporttyq is-shara bolmaq. Aýqymdy deńgeıdegi jarystar qazaqstandyq sportshylarǵa óz sheberlikterin arttyryp, sheteldiń myqty shabandozdarymen básekege túsip, halyqaralyq týrnırlerge biliktilik joldamalaryn alý múmkindigin beredi.

Osyǵan deıin qazaqstandyqtar at sportynan Tashkentte ótken iri týrnırlerde sátti óner kórsetkeni týraly jazdyq.