Astanada at qulaǵynda oınaıtyn shabandozdardyń oıyny qatty unady - Gollıvýd akteri Maıkl Medsen
ASTANA. 5 shilde. QazAqparat /Gúlmıra Álıakparova/ - Astanaǵa arnaıy kelgen Gollıvýd akteri Maıkl Medsenge at qulaǵynda oınaıtyn shabandozdardyń kórsetilimi unady.
Bul týraly ol búgin jýrnalıstermen ótken baspasóz máslıhatynda aıtty.
Eske salaıyq, M.Medsen Qazaqstanǵa Astana kúni aıasynda elordada ekinshi ret shymyldyǵyn ashqan Ekshn-fılmderdiń «Astana» halyqaralyq festıvaline qatysý úshin arnaıy keldi.
1 shildeden Astanada júrgen Gollıvýd akteri qala kúnine arnalǵan merekelik is-sharalarǵa da qatysyp úlgerdi. Ol ózine bárinen buryn «Astana aınalasyndaǵy myńjyldyqtar» kóshpeliler órkenıeti festıvaline arnap turǵyzylǵan qazaq aýyly qatty unaǵanyn jáne at qulaǵynda oınaıtyn shabandozdardyń kórsetilimi tánti etkenin aıtty.
«Bári tamasha boldy. Men ózimmen birge uldarymdy alyp kelmegenime qatty ókindim. Ókinishke qaraı, qalada kóp serýendeýge múmkindigim bolmady, sebebi festıvalǵa qatysty mindetterim kóp boldy. Biraq kelesi jyly Tımýrdan (red. - festıvaldyń prezıdenti, rejısser, prodıýser Tımýr Bekmambetov) ózimdi qazylar alqasynyń quramyna qosýdy suraýdy oılap otyrmyn. Múmkin sol ýaqytta qalany kórýge múmkindigim bolatyn shyǵar», - dedi ol.
M.Medsen sondaı-aq Qazaqstandy óte úlken jáne óte ádem el dep sanaıtyndyǵyn jetkizdi. «Meni osynda shaqyrǵandaryńyz úshin barlyqtaryńyzǵa rızashylyǵymdy bildiremin. Men munda óte talantty adamdardyń aınalasynda boldym», - dep túıindedi ol.
«Armand Assante óziniń otbasynda qaıǵyly oqıǵa bolǵanyna qaramastan menimen birge keldi. Onyń anasy baqılyq boldy. Bul onyń tarapynan batyldyq boldy. Men ómirimde 130-dan astam fılmge tústim. Meniń oıymsha, kıno - bul óte mańyzdy is. Biraq meniń elimde ol ókinishke qaraı, ótken kúnniń belesinde qalyp barady. Árıne, olar 140 mıllıon dollar bıýdjetti, 3D-daǵy fılmder bolmasa. Ondaı kınolarǵa shaqyrsa qýanar edim», - dep túıindedi akter.
