Astanada asyqtyń mergenderi anyqtaldy

ASTANA. QazAqparat - EKSPO-2017» halyqaralyq mamandandyrylǵan kórmesi aıasynda ótkizilgen 9-shy «Altyn saqa» halyqaralyq týrnıri óziniń máresine jetti, dep habarlaıdy QazAqparat tilshisi.

2017 jyldyń 2-4 shilde kúnderi Astana qalasynyń «Saryarqa» velotreginde asyq atýdan «Altyn saqa» halyqaralyq týrnıri ótkizildi. Jyl saıyn dástúrli ótip kele jatqan jarysqa Qyrǵyzstan, Mońǵolııa jáne Qytaı sportshylary keldi. Sonymen qatar Almaty, Astana qalalary men Aqmola, Qostanaı, Qaraǵandy, ShQO, OQO jáne Jambyl oblystarynyń qurama komandalary qatysty.

Jarystyń ashylý saltanatynda Qyrǵyzstan Respýblıkasynyń "Aıkýr" federatsııasynyń vıtse-prezıdenti  Qojekeev Eskendir sóz alyp, asyq oıynynyń tárıbelik mánine toqtaldy.

«Biz qazaq-qyrǵyz ejelden aǵaıyn halyqpyz. Asyq adamdy eptilikke, mergendikke, dáldikke úıretedi. Biz ulttyq oıyndarymyzdy keıingi urpaq arasynda únemi dáripteýimiz kerek», -  dedi ol.

Týrnırde erler arasynda 13 komanda, qyzdar arasynda 8 komanda baq synasty.

Úsh kúnge sozylǵan básekede erler arasynda «Qazaqstan» komandasy birinshi, Qyrǵyzstan ekinshi oryndy jeńip aldy. Al úshinshi oryndy Jambyl oblysy aldy. Qyzdar arasynda ótken «Bes tas» saıysynda júldeli oryndardy Qostanaı, Astana jáne astanalyq «Jiger» qurama komandalary ózara bólisti.

«Asyq atý» kóshpendi halyqtardyń ejelgi ǵasyrlardan kele jatqan oıyny. Oıyn erejesi boıynsha, qoı nemese eshkiniń asyqtary paıdalanylady.

Aıta keteıik, «Altyn saqa» halyqaralyq týrnıri jyl saıyn dástúrli túrde Astana kúni qarsańynda ótkizilip kele jatyr.