Astanada asyq atýdan respýblıkalyq týrnır ótedi
ASTANA. QazAqparat - 25 mamyr kúni elordadaǵy L.N.Gýmılev atyndaǵy Eýrazııa ulttyq ýnıversıtetiniń sport kesheninde asyq atýdan respýblıkalyq ashyq týrnır ótedi.
QR Sport jáne dene shynyqtyrý isteri agenttigi, QR Ulttyq sport túrleri qaýymdastyǵy men respýblıkalyq Asyq atý federatsııasy uıymdastyratyn týrnırde elimizdiń ár oblysy men Astana jáne Almaty qalalarynyń komandalary básekege túsedi. Jarysqa sheteldik komandalarynyń da qatysýǵa múmkindikteri bar, dep habarlaıdy Qazaqstan Respýblıkasy Ulttyq sport túrleri qaýymdastyǵynyń baspasóz qyzmetinen.
Ár komanda quramyna 3 adam kiredi: 16-ǵa tolmaǵan oıynshy, 16-dan asqan sportshy jáne 1 jetekshi. Ashyq týrnırge elimizge tanymal tulǵalar men zııaly qaýym ókilderi de qatysady dep kútilýde.
Saıys QR Ulttyq sport túrleri qaýymdastyǵy men QR Sport jáne dene shynyqtyrý isteri agenttiginiń 2011 jyly bekitken «Asyq atý oıynynyń erejesi» boıynsha júrgiziledi.
Jeńimpazdar men júldegerler dıplomdarmen marapattalyp, qomaqty júldege ıe bolady. 1-shi oryn úshin 300 myń teńge, 2-orynǵa - 200 myń teńge, 3-oryndy ıelengen júldegerge - 100 myń teńge kóleminde syıaqy beriledi.
