Astanada astyq pen burshaq daqyldaryn tereń óńdeıtin keshenniń qurylysy bastaldy
ASTANA. KAZINFORM — Bul joba eldiń agroónerkásiptik kesheniniń damýyndaǵy jańa kezeńdi bildiredi jáne Qazaqstannyń ınnovatsııalyq tehnologııalarǵa, ekologııalyq turaqtylyqqa jáne halyqaralyq áriptestikke negizdelgen qosylǵan qun tizbegin qalyptastyrý jónindegi strategııalyq baǵytyn tolyqtaı aıqyndaıdy. Bul týraly AShM baspasóz qyzmeti málim etti.
Jobanyń ınvestıtsııa kólemi 320 mln AQSh dollar.
Kapsýla salý rásimine Aýyl sharýashylyǵy mınıstri Aıdarbek Saparov, Astana qalasynyń ákimi Jeńis Qasymbek, isker top ókilderi, sarapshylar qaýymdastyǵy jáne jurtshylyqtyń qatysýymen ótti.
Mınıstr jobanyń ulttyq azyq-túlik qaýipsizdigi men agrarlyq sektordyń eksporttyq áleýetin nyǵaıtýdaǵy mańyzdy rólin atap ótti:
– Memleket basshysy óz Joldaýynda aýyl sharýashylyǵy ónimderin tereń óńdeýdiń mańyzdylyǵyna, oǵan otandyq ári sheteldik ınvestorlardy tartý qajettigine erekshe nazar aýdarǵan bolatyn. Búgin biz osy saladaǵy eń iri jobalardyń birin iske qosyp otyrmyz. Bul joba jyl saıyn 250 myń tonna astyq pen 80 myń tonna burshaq daqyldaryn qaıta óńdeýge múmkindik beredi. Sonyń nátıjesinde qosymsha eksporttyq múmkindikter ashylyp, joǵary tabysty ónimder óndiriledi ári Qazaqstannyń agrarlyq derbestigine qaraı mańyzdy qadam jasalady. Bul keshen halyqaralyq yntymaqtastyqtyń jarqyn úlgisine aınalatynyna jáne Qazaqstan men Túrkııa arasyndaǵy strategııalyq seriktestiktiń jańa kezeńin ashatynyna senemin, – dedi Aıdarbek Saparov.
Tiryaki Agro Holding dırektorlar keńesiniń tóraǵasy Súleımen Tırıakıoǵlý da sóz alyp, keshen qurylysynyń bastalýy tek Qazaqstan úshin ǵana emes, álemdik agrarlyq ındýstrııa úshin de mańyzdy úles ekenin atap ótti:
– Bizdiń maqsatymyz – jahandyq naryqta suranysqa ıe, quny joǵary ónim shyǵaratyn joǵary tehnologııalyq óndiris qurý. Biz osy bastamanyń bir bóligi bolǵanymyzǵa jáne qazaqstandyq seriktestermen tyǵyz áriptestikte jumys istep jatqanymyzǵa maqtanamyz, – dedi ol.
Joba eki kezeńmen júzege asyrylady: 2027 jyl – jyldyq qýattylyǵy 250 myń tonna bolatyn bıdaıdy tereń óńdeý jelisin iske qosý; 2028 jyl – jyldyq qýattylyǵy 80 myń tonna bolatyn burshaq daqyldaryn óńdeý jelisin paıdalanýǵa berý.
Nátıjesinde keshen glıýten, krahmal, lızın, ósimdik proteın ızolıattary, quramajem jáne basqa da joǵary qosylǵan qundy ıngredıentterdiń keń aýqymyn óndiredi. Ónim ishki naryqqa da jetkizilip, TMD elderine, Eýropalyq odaqqa, Soltústik Amerıkaǵa jáne Ońtústik-Shyǵys Azııaǵa eksporttalatyn bolady.
Bul joba eldiń agroónerkásiptik kesheninde júzege asyrylyp jatqan aýqymdy bastamalardyń qataryn tolyqtyrady. Olardyń ishinde: Túrkistan oblysynda «KazKrahmal» kompanııasynyń jylyna 150 myń tonna júgerini tereń óńdeıtin zaýyt qurylysy, Jambyl oblysynda Fufeng Group kompanııasynyń 1 mln tonna júgerini qaıta óńdeýdi kózdeıtin jobasy bar.
Aıta keteıik, eldiń astyq eksporty 12,8 mln tonnaǵa jetti.