Astanada «AstanaFlorExpo - 2011» II Halyqaralyq gúlder men landshaft dızaıny kórmesi ótip jatyr
ASTANA. 27 cáýir. QazAqparat /Aınur Kenebaeva/ - Astanada «AstanaFlorExpo - 2011» II Halyqaralyq gúlder men landshaft dızaıny kórmesi ótip jatyr. Búgin Astanalyq «Kórme» kesheninde halyqaralyq kórme resmı túrde óz jumysyn bastady.
Kórmeni QR Aýyl sharýashylyǵy mınıstrligi, QR Qurylys jáne turǵyn úı-kommýnaldyq sharýashylyǵy isteri agenttigi jáne Astana qalasy ákimdiginiń qoldaýymen «Astana-Ekspo KS» kórmelik kesheni «TsvetyEkspo» halyqaralyq kórme dırektoratymen birlese uıymdastyryp otyr.
Kórmege gúl satý, kógaldandyrý jáne landshaftyq dızaın isimen aınalysatyn 25 otandyq jáne Gollandııa, Kenııa, Kolýmbııa, Reseı, AQSh, Túrkııa syndy memleketterden kelgen 50 shet eldik kompanııa qatysýda.
Kórme aıasynda gúl dızaınynyń ozyq úlgilerimen tanystyratyn «Gúl álemi» atty florıstıkalyq festıval ótkizilmek. Festıvaldiń arqaý eter taqyryby úılený toıy bolmaq. Otandyq ári shet eldik florıst-mamandar qalyńdyqtyń qolǵa ustaıtyn gúl shoqtarynan bastap, toıǵa arnalǵan lımýzınderdi bezendirýge deıingi shyǵarmashylyq sheberlikterin jurtshylyq nazaryna usynbaq.
«AstanaFlorExpo - 2011» kórmesi sáýir aıynyń 29 juldyzyna deıin jalǵaspaq.
