Astanada jas pıanıster baıqaýy bastaldy

ASTANA. KAZINFORM — Astanada 2024 jylǵy 9-13 jeltoqsan aralyǵynda Mádenıet jáne aqparat mınıstrliginiń qoldaýymen Qazaq ulttyq óner ýnıversıteti uıymdastyrǵan «Astana Piano Passion» II Respýblıkalyq jas pıanıster baıqaýy ótip jatyr.

Mádenıet jáne aqparat mınıstrliginiń baspasóz qyzmeti málim etkendeı, baıqaý ulttyq fortepıano mektebin damytyp, daryndy jas mýzykanttardy qoldaýǵa, sondaı-aq klassıkalyq jáne akademııalyq mýzykany, qazaqstandyq kompozıtorlardyń mýzykasyn jáne fortepıanoda oryndaý sheberligin dáripteýge baǵyttalǵan.

Uıymdastyrýshylar qatysýshylardyń oryndaý sheberligin arttyrý, olardyń kásibı damýyna úles qosý jáne halyqaralyq jobalarǵa daıyndyq jasaý sekildi mindetterdi alǵa qoıady. Sonymen qatar, is-shara barysynda tárbıeshiler men oqýshylar arasynda tájirıbe almasýǵa da jaǵdaı jasalǵan.

— Baıqaýǵa Qazaqstannyń mádenıet jáne óner salasy boıynsha bilim berý uıymdarynda «Fortepıano» mamandyǵynda oqıtyn 7 jastan 18 jasqa deıingi jas pıanıster qatysa alady. Aldyńǵy «Astana Piano Passion» konkýrstarynyń Gran-prı jəne birinshi oryn ıegerleri bul dodaǵa sol jas kategorııasynda qatysa almaıdy. Baıqaý tórt jas kategorııasy boıynsha ótedi. Atap aıtsaq, 7-9 jas, 10-12 jas, 13-15 jas jáne 16-18 jas aralyǵyndaǵy ónerpazdar, — dep túsindirdi mınıstrlik.

Baıqaýdyń birinshi kúni «S» sanatyndaǵy qatysýshylardyń jerebesi men tyńdalymy jáne QR eńbek sińirgen ártisi A. Tebenıhınniń sheberlik synyby ótti. Konkýrstyń onlaın-translıatsııasyn QazUÓÝ YouTube-arnasynan tamashalaýǵa bolady.

Qosymsha aqparatty www.pianopassion.kz saıtynan taba alasyz.

Aıta keteıik, budan buryn Qazaq ulttyq horeografııa akademııasynyń stýdentteri halyqaralyq baıqaýda jeńiske jetkeni habarlandy.