Astanada «Astana Piano Passion» Halyqaralyq jas pıanıster baıqaýy ótedi
ASTANA. 14 sáýir. QazAqparat - Astana qalasynda 10-16 mamyr aralyǵynda ótetin "Astana Piano Passion" І Halyqaralyq klassıkalyq mýzyka festıvali aıasynda "Astana Piano Passion" Halyqaralyq jas pıanıster baıqaýy ótedi. Bul týraly festıvaldiń baspasóz qyzmeti habarlady.
Baıqaýdy uıymdastyrýshylar - Astana qalasynyń ákimdigi, "Accordi di Astana" qoǵamdyq qory.
Jobanyń kórkemdik jetekshisi jáne qazylar alqasynyń tóraǵasy - Reseıdiń halyq artısi Denıs Matsýev.
Baıqaýdyń maqsaty: óskeleń urpaqtyń rýhanı tárbıesiniń mańyzdy bóligi retinde, klassıkalyq fortepıano mýzykasyn nasıhattaý, jas mýzykanttarǵa shyǵarmashylyq joldy baǵyndyrýda alǵashqy baspaldaqtan bastap qoldaý kórsetý.
Baıqaýdyń mindetteri: fortepıano óneri salasynda jańa daryn ıelerin anyqtaý; Qazaqstannyń ulttyq fortepıano mektebi dástúrlerin nyǵaıtý; halyqaralyq mýzykany oryndaý óneri ádistemesimen almasý; ulttyq mektepterdiń shyǵarmashylyq baılanystary men dástúrlerin nyǵaıtý; mýzykalyq bilim beretin mekemelerdiń fortepıano bólimderinde kásibı oqytý deńgeıin arttyrý.
Qatysýshylardyń ónerlerin bedeldi halyqaralyq qazylar alqasy baǵalaıdy, olardyń quramynda Qazaqstan Respýblıkasynyń, QHR, Ońtústik Koreıanyń, AQSh, Eýropanyń jáne Reseıdiń ókilderi bar.
Jalpy júlde qory - 5000 AQSh dollary.
Baıqaýdyń arnaıy júldeleri: Astana qalasynyń ákiminen; baıqaýdyń kórkemdik jetekshisinen; Qazaq kompozıtorynyń shyǵarmasyn úzdik oryndaýshyǵa; oqý granttary. Sondaı-aq baıqaýdyń І syılyǵynyń laýreaty atanǵan baıqaýǵa qatysýshy pedagogtarǵa syılyqtar taǵaıyndalǵan.
Baıqaýǵa bastaýysh, orta jáne joǵary mýzykalyq bilim beretin mekemelerdiń oqýshylary - baıqaý bastalar kúni 18 jasqa tolmaǵan, bekitilgen úlgide ótinish bergen jas pıanıster qatysady.
Baıqaýǵa qatysýǵa ótinishter 2013 jyldyń 10 qańtarynan bastap 2013 jyldyń 10 naýryzyna deıin qabyldanady.
Baıqaý úsh kezeńnen turady:
- irikteý týry (beınejazba boıynsha)
- birinshi týr (jeke baǵdarlama)
- ekinshi týr (orkestrli kontsert)
Іrikteý týry Astana qalasynda 2013 jyldyń 10-nan bastap 30 naýryzyna deıin ótkizilýde. Baıqaý qatysýshylary irikteý týrynyń qorytyndylary boıynsha anyqtalady. Birinshi týrǵa 30 jas mýzykant ótkiziledi.
