Astanada «Astana EXPO 2017 International Criterium» velojarysy bastaldy
Búgin «EKSPO-2017» aýmaǵynda qatysýshylardyń tanystyrylymy ótti. Sharany tanymal reseılik jýrnalıst, «Eurosport» arnasynyń orys redaktsııasynyń altyn daýysy - Sergeı Kýrdıýkov júrgizdi.
«Tamasha sporttyq shara qatysýshylaryn quttyqtaımyn. Ózderińiz bilesizder, bizdiń teńdessiz komandamyzdyń arqasynda Astana velosıped áleminde tanymaldylyqqa ıe boldy. Onda Astananyń komanda ǵana emes, qala retinde de tanylǵanyn qalaımyz, sondyqtan mundaı aýqymdy sharalardyń bizdiń qalada ótetinine qýanyshtymyz jáne jyl saıyn uıymdastyrý úshin bar kúshimizdi salamyz. Barshańyzǵa tabys pen jeńis tileımin!», - dedi elorda ákimi Áset Isekeshev tanystyrylym barysynda.
Velojarysqa álemniń 15 elinen jınalǵan 20 komanda qatysýda. Olardyń arasynda quramyna Grand týrlardyń jeńimpazdary men júldegerleri, velosport boıynsha olımpıadalyq oıyndardan medal alǵandar enetin Álemdik týrdyń kásibı komandalary da bar.
Kósh bastap turǵandar qatarynda «Týr de Frans» jeńimpazy, brıtandyq Team Sky komandasynyń ókili Krıs Frým jáne onyń serigi Mıkel Landa jáne «Astana» quramynda óner kórsetken, qazirgi Astana Pro Team kóshbasshysy Fabıo Arý bar.
Velosıpedshiler Túrkistan, Dostyq, Aqmeshit jáne Qonaev kósheleri arqyly «Báıterek» monýmentin 1,6 shaqyrymnan 30-35 ret aınalyp shyǵady.
