Astanada Astana Eurasian Book Fair–2026 halyqaralyq kitap kórme-jármeńkesi ótedi
ASTANA. KAZINFORM – Elordadaǵy Prezıdent ortalyǵy ǵımaratynda 22–26 sáýir kúnderi «Astana Eurasian Book Fair–2026» IX halyqaralyq kitap kórme-jármeńkesi ótedi, dep habarlaıdy qala ákimdiginiń resmı saıty.
Atalǵan shara QR Mádenıet jáne aqparat mınıstrligi men Astana qalasy ákimdiginiń qoldaýymen Folıant baspasy tarapynan uıymdastyrylyp otyr. Bul – Ortalyq Azııadaǵy eń iri mádenı-aǵartýshylyq jobalardyń biri.
Kórme-jármeńkege 80-ge jýyq baspa, ǵylymı-bilim berý jáne polıgrafııalyq kompanııa qatysady. Onyń ishinde Qazaqstan, Reseı, Túrkııa, Qyrǵyzstan, Ózbekstan, Ázerbaıjan, Mońǵolııa, Ispanııa, Qytaı, Iran, Belarýs, Portýgalııa, Venesýela jáne Ulybrıtanııa elderinen 40-qa jýyq sheteldik uıym bar.
Bes kúnge josparlanǵan mádenı-iskerlik baǵdarlama aıasynda jańa kitaptardyń tusaýkeserleri, avtorlarmen kezdesýler, avtograf-sessııalar, sondaı-aq balalarǵa arnalǵan sheberlik saǵattary ótedi.
Atap aıtqanda, Bekarys Shoıbekov, Marjan Ershý, Erlan Qojabaev, Ularbek Dáleı, Álisher Rahat syndy avtorlardyń eńbekterimen qatar, Anjeı Sapkovskıı, Haver Moro, Ernest Hemıngýeı shyǵarmalarynyń tanystyrylymy ótedi dep josparlanǵan.
23 sáýirde Ulttyq kitap kúnine oraı QR Mádenıet jáne aqparat mınıstrligi uıymdastyrǵan respýblıkalyq «Ulttyq kitap» baıqaýy jeńimpazdaryn marapattaý rásimi ótedi.
Kórmeniń saltanatty ashylýy 22 sáýir kúni saǵat 11:00-ge josparlanǵan. Іs-sharaǵa memleket jáne qoǵam qaıratkerleri, belgili qalamgerler men sheteldik dıplomatııalyq korpýs ókilderi qatysady.
Aıta keteıik, bıyl balalarǵa arnalǵan 42 myń kitap jaryq kóredi.
