Astanada «Astana daryny» aqparattyq-ádistemelik jýrnalynyń tusaýkeseri boldy
ASTANA. 13 mamyr. QazAqparat/Aınur Kenebaeva/ - Elimizdiń Ulttyq akademııalyq kitaphanasynda «Astana daryny» aqparattyq-ádistemelik jýrnalynyń tusaýkeseri bolyp ótti.
Jýrnal jastar shyǵarmashylyǵyn yntalandyrý arqyly olardy ǵylymı, shyǵarmashylyq jáne qoǵamdyq jumystarǵa tartý maqsatynda jaryqqa shyǵarylyp otyr.
«Astanada, jalpy Qazaqstanda daryndy, isker jastar óte kóp. Úzdiksiz ótip jatqan halyqaralyq olımpıadalarǵa, shyǵarmashylyq jarystarǵa jastardyń kóptep qatysýy jáne júldeli oryndardy enshileýi osynyń aıqyn dáleli. Daryny dara, parasat-paıymy zańǵar bıik jastar týraly maqtanyshpen nege aıtpasqa. Mine osyndaı maqsatta biz oqýshylar men ustazdarǵa arnalǵan jýrnal shyǵarýdy kózdedik», - dedi aımaqtyq ǵylymı-tájirıbelik «Astana daryny» ortalyǵynyń dırektory Maıra Qurmanbaeva.
Jýrnaldyń birinshi basylymy 500 dana taralymmen jaryqqa shyqty. Maıra Qurmanbaevanyń aıtýynsha, bolashaqta jýrnal taralymyn 1300 danaǵa deıin arttyrý josparlanyp otyr.
Atalmysh jýrnal úsh tilde shyǵarylady jáne oqýshylardyń qazirgi tańdaǵy ómirinen, jetistikterinen keń kólemdi maǵlumat beretin jeti aıdardan turady. Jýrnaldyń «Aqyl-darııa», «Psıhologııalyq qyzmet», «Kaleıdoskop» syndy aıdarlarynan álemdegi daryndy balalar, ata-analar men ustazdarǵa qajetti paıdaly keńester, belgili bir jetistikterge qol jetkizgen talaby tegeýrindi jastar jóninde qyzyqty aqparat alýǵa bolady. Keleshekte aıdarlar sanyn arttyrý kózdelinip otyr.
«Astana daryny» aqparattyq-ádistemelik jýrnaly búkil Qazaqstan Respýblıkasy aýmaǵynda barlyq bilim berý mekemelerinde taratylatyn bolady.
