Astanada «Assambleıa jastary» qoǵamdyq birlestiginiń onlaın májilisi ótti
Sharaǵa Qazaqstan halqy Assambleıasy tóraǵasynyń orynbasary Marat Ázilhanov, «Assambleıa jastary» qoǵamdyq birlestiginiń tóraǵasy Tımýr Jumyrbaev, memlekettik organdar men respýblıkalyq jastar uıymdarynyń ókilderi qatysty.
«Búgin biz assambleıa jastarymen, jastar uıymdarynyń jáne birlestikteriniń ókilderimen olardyń jumysyndaǵy ózekti máselelerdi talqylaý úshin kezdesip otyrmyz. Qazirgi tańda jastar uıymy qabyldaǵan sharalardyń tıimdiligi men nátıjeli bolýy jastar bastamasyn damytýdyń ólshemine aınalyp otyr. Ótken aıda bolǵan oqıǵalar jastardyń quqyqtyq jáne qarjylyq saýattylyǵyn, baqýattylyǵyn arttyrý qajet ekenin kórsetti», - dedi Marat Ázilhanov.
Shara barysynda «Assambleıa jastary» respýblıkalyq qoǵamdyq birlestiginiń qyzmeti týraly QHA múshesi Tımýr Jumyrbaev baıandady.
«Assambleıa jastary» uıymynyń basty maqsaty – jastardy qoǵamdyq kelisim negizinde toptastyrý, jastardyń bastamalaryn damytý jáne áleýmettik turǵyda qoldaý. Qańtardaǵy oqıǵalar jaǵdaıynda jastarmen júıeli jumys júrgizý jastar uıymdarynyń ǵana emes, memlekettik organdardyń jumysynyń da ózegi bolyp tur. Búginde biz aldymyzǵa jastarǵa naqty kómek berý jóninde maqsat qoıyp otyrmyz. Biz jumysymyz jemisti bolý úshin belsendi eńbektenemiz. Búginde 17 oblysta ókildigimiz bar. Munymen toqtap qalmaımyz. Ýaqyt óte kele monoqalalarǵa, aýyldy eldi mekenderge shyǵamyz. Qazir shaǵyn qalalarda jastarmen jumys jaqsy jolǵa qoıylǵan», - dedi Tımýr Jumyrbaev.
Shara aıasynda «Molodej» ǵylymı-zertteý ortalyǵy» JShS dırektorynyń orynbasary, QHA múshesi Elına Paýlı jastar arasyndaǵy zamanaýı tendentsııalar men olardyń suranystary týraly málimet berdi.
