Astanada ásirese jetige tolmaǵan balalar arasynda qyzylsha asqynyp tur - basqarma
Elordanyń ınfektsııalyq statsıonarlary qyzylshaǵa baılanysty kúsheıtilgen rejımde jumys istep jatyr, dep habarlaıdy Kazinform Astana ákimdiginiń resmı saıtyna silteme jasap.
Maýsymdyq vırýstyq ınfektsııalar, onyń ishinde qyzylshanyń órshýine baılanysty № 3 kópsalaly qalalyq balalar aýrýhanasynda kelýshiler sany artty.
Qabyldaý bólmesinde dáriger kómegin kútkenderden uzyn-sonar kezek qalyptasty.
«Iá, shynynda da dárigerdiń qabyldaýyn kútý ýaqyty keıde 1,5-3 saǵattan asady. Sebebi jedel járdem shaqyrǵan patsıentter sany 2,5 esege deıin ósti. Bul vırýstyq ınfektsııa — JRVI, qyzylsha, jedel ishek ınfektsııasy jıiliginiń artýyna baılanysty. Osyǵan oraı jalpy qabyldaý bólmesinde 8 qabyldaý beketi, onyń ishinde qyzylsha boıynsha qabyldaý bólmesinde 2 beket uıymdastyryldy. Táýekel tobyndaǵy balalarǵa (Triage júıesi boıynsha qyzyl tús) kezekten tys qyzmet kórsetiledi. Sondaı-aq, árbir ınfektsııalyq bólimshege qosymsha orta medıtsınalyq personaldyń taǵy bir beketi qoıyldy», — dep túsindirdi aýrýhananyń baspasóz qyzmeti.
Densaýlyq saqtaý basqarmasynyń málimetinshe, qalada qyzylsha boıynsha tósek-oryn júktemesi — 42%.
Eresekter arasynda qyzylsha juqtyryp, statsıonarda emdelip jatqan 63 naýqas bar. Olardyń jaǵdaıy — ortasha aýyr.
«Eresekter arasynda qyzylsha juqtyrý qarqyny tómen ekenin kórip otyrmyz, al aýyr asqynýǵa negizinen mektep jasyna deıingi balalar ushyrap jatyr. Aýrýhanada jatqan 1 jastan 7 jasqa deıingi balalardyń 70% qyzylshamen kelgen. Bul — vaktsına almaǵan balalar, al ekpe alǵandar aýrýdy ambýlatorııalyq deńgeıde jeńil ótkeredi. Olardyń denesinde mundaı joǵary temperatýra men bórtpe bolmaıdy. 3-5 kúnde saýyǵady. Olardy vaktsına qutqardy», — deıdi qalalyq densaýlyq saqtaý basqarmasy.
Dárigerler qyzylshanyń aldyn alý jáne qorǵaý vaktsınatsııa arqyly ǵana múmkin ekenin kezekti ret eske saldy.
Aıta keteıik, elordada qyzylshaǵa qarsy qosymsha jappaı ımmýndaý jalǵasyp jatyr.
Balalar ekpeni qalanyń barlyq emhanasynan tegin ala alady.
