Astanada áskerılendirilgen temir jol kúzetiniń eks-qyzmetkerlerine qatysty sot úkimi shyqty

ASTANA. KAZINFORM —2024 jyly 29 sáýirde Astana qalasynyń qylmystyq ister jónindegi aýdanaralyq sotynda mekemege asa iri mólsherde zııan keltirdi dep aıyp taǵylǵan «Áskerılendirilgen temir jol kúzeti» JShS-nyń burynǵy qyzmetkerlerine qatysty úkim shyqty. 

Astana qalasynyń qylmystyq ister jónindegi mamandandyrylǵan aýdanaralyq sotynyń málimetinshe, sotta N-nyń JShS bas dırektory bola otyryp, bas dırektordyń orynbasary M-men jáne bas menedjer S-men aldyn ala sóz baılasyp, beınebaqylaý júıesine arnalǵan jabdyqtar keshenin satyp alýǵa arnalǵan 159 mln teńgeden astam asa iri mólsherdegi mekemege tıesili aqshalaı qarajatty ıemdengeni anyqtaldy. Sondaı-aq, N. óz ókilettigin asyra paıdalanyp, S-ny JShS-niń qurylymdyq bólimshesine kólik júrgizýshisi retinde jumysqa ornalastyryp, óziniń jeke maqsattary úshin paıdalanǵan. Osylaısha, jalaqy túrinde tólengen 1,5 mln teńgeden astam soma kóleminde JShS-ǵa zalal keltirilgen.

Prokýror sottalýshylarǵa 8 jylǵa bas bostandyǵynan aıyrý jazasyn taǵaıyndaýdy surady. Sottalýshylar kinálaryn moıyndamaı, ózderin aqtaýdy surady.

Jábirlenýshiniń ókili sottyń qalaýy boıynsha jaza taǵaıyndaýdy, sondaı-aq azamattyq talapty qanaǵattandyrýdy surady. Aıyptalýshylardyń kinási JShS qyzmetkerleriniń kýágerleriniń aıǵaqtarymen, aýdıtorlyq qorytyndylarmen, saraptamalarmen, sondaı-aq qylmystyq istiń basqa da materıaldarymen dáleldendi.