Astanada áskerılendirilgen apattyq-qutqarý qyzmetiniń burynǵy basshysy sottaldy
ASTANA. QazAqparat - Kásibı áskerılendirilgen apattyq-qutqarý qyzmeti» RMK bas dırektory Bolat Halyq 7 jyl jáne 6 aıǵa bas bostandyǵynan aıyryldy, dep habarlaıdy QazAqparat.
Astana qalasy Almaty aýdany №2 sotynyń baspasóz qyzmeti habarlaǵandaı, úkim 11 maýsym kúni shyqqan.
«Bolat Halyq QR Qylmystyq Kodeksiniń 189-baby, 4,5 bólimderi, 2 pýnktinde jáne 366-baby 3-bólimi, 1,4 pýnktterinde kórsetilgen quqyqbuzýshylyqtardy jasaýda aıypty dep tanyldy. Sot kesimdi túrde 7 jyl jáne 6 aıǵa bas bostandyǵynan aıyrý túrinde jaza taǵaıyndady», - delingen baspasóz qyzmeti jibergen habarlamada.
Sondaı-aq, sot sheshimimen Bolat Halyq memlekettik qyzmette laýazymdy oryndarǵa taǵaıyndala almaıdy.
Eske sala ketsek, ótken jyldyń mamyr aıynda Sybaılas jemqorlyqqa qarsy is-qımyl ulttyq bıýrosynyń Astana qalasy boıynsha departamenti Bolat Halyqty 70 myń AQSh dollary somasynda kezekti para alý barysynda ustady. Onyń turǵylyqty mekenjaıyn tintý barysynda 300 myń AQSh dollary men 6 mln teńge tabyldy.
