Astanada áskerı psıhologtar jeke quramnyń psıhologııalyq daıyndyq ádisterin tájirıbe túrinde pysyqtady

ASTANA. 22 qazan. QazAqparat - Astanadaǵy desantty-shabýyldaýshylar brıgadasynda Qazaqstan Respýblıkasy Qarýly Kúshteri Qurlyq áskerleri ofıtser-psıhologtarynyń jıyny ótýde. Ásker túriniń barlyq bólimderi men quramalarynan jınalǵan júzge jýyq psıholog jıynnyń ekinshi kúni ózderiniń psıhologııalyq jáne dene daıarlyǵy tózimdilikterin synǵa saldy.

Bul týraly QR Qorǵanys mınıstrliginiń baspasóz qyzmetinen habarlandy.

Áskerı psıhologtar alǵash ret strestik jaǵdaıda ózin-ózi baqylaý jáne jeke quramnyń psıhologııalyq daıyndyq ádisterin tájirıbe túrinde pysyqtady. Toqsan paıyzǵa jýyǵy áıelderden turatyn psıhologtar tank astyna túsip, granat laqtyrý sııaqty kúrdeli is-qımyldardy jasady. Sonymen qatar, olar ot jolaqty joldan turatyn túrli kedergilerdi júrip ótý arqyly ózderiniń jan-jaqty daıarlyqtaryn kórsetti.

«Bul jıyn áskerı qyzmetshilerdiń uıymdastyrý-ádistemelik jáne tájirıbelik daıyndyǵyn jetildirý men qalyptastyrý úshin jyl saıyn ótip turady. Jıynǵa qatysýshylar bolýy múmkin psıhogendik shyǵyndardy anyqtap, olardyń aldyn alýǵa úırenedi. Áskerı psıhologtar osyndaı jıyndardan óz sheberlikterin shyńdap, jınaǵan tájirıbelerin kúndelikti qyzmette paıdalanary sózsiz. Buǵan deıin áskerı psıhologtar tek teorııa túrinde synnan ótse, bıyl qoldaryna qarý alyp, túrli jaýyngerlik tapsyrmalardy oryndaýda», - dedi jıynǵa basshylyq jasaǵan QR QK Qurlyq áskerleri bas qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Jumabek Hasenov.

Jıyn sheńberinde jaýyngerlik jaǵdaıdaǵy jedel psıhologııalyq dıagnostıka kórsetetin jáne qajetti psıhologııalyq járdem jasaıtyn oqý núkteleri de uıymdastyrylǵan.