Astanada áskerı polıtsııa otrıadynyń qyzmetshileri qylmystyń aldyn aldy

ASTANA. QazAqparat - Qazaqstan Respýblıkasy Qorǵanys mınıstrligi Áskerı polıtsııa otrıadynyń áskerı qyzmetshileri qylmystyń aldyn aldy, dep habarlandy QR QM resmı saıtynda.

QR QM Rejım men qaýipsizdikti qamtamasyz etý jónindegi Áskerı polıtsııa otrıadynyń táýliktik narıady jeltoqsanda mereke kúnderiniń qarsańynda kezekshilik jasaǵan bolatyn. Tańǵy 04.20-lar shamasynda 4-posttyń saqshysy serjant B. Bolat Syǵanaq jáne Aqmeshit kósheleriniń qıylysynda kanalızatsııalyq lıýkti ashqan kúdikti adamdy baıqaıdy. Lıýkke taǵy eki adam qarǵyp túsedi.

Saqshy ile-shala aǵa leıtenant N. Súleımenovke habarlaıdy. Kezekshi operator - qatardaǵy jaýynger D. Ádil basqarylatyn kamera arqyly belgisiz adamdardyń qımyldaryn qadaǵalap otyrady. Qabyldanǵan sharalar men táýliktik narıadtyń is-qımyly nátıjesinde kúdikti adamdar quryqtalyp, QR Іshki ister mınıstrliginiń qyzmetkerlerine tabystaldy.

QR ІІM qyzmetkerleriniń júrgizgen jedel-izdestirý sharalary barysynda olardyń tehnıkalyq úńgijol arqyly telekommýnıkatsııanyń mys kabelderin urlamaq bolǵany anyqtaldy. Qyraǵylyqtary úshin aǵa leıtenat N. Súleımenov, serjant B. Bolat, aǵa serjant R. Núsipjanov jáne qatardaǵy jaýynger D. Ádilge alǵys jarııalandy.