Astanada áskerı orkestrlerdiń dástúrli festıvali bastaldy
Bıylǵy halyqaralyq baıqaýǵa irikteý syndarynan súrinbeı ótken Qazaqstan Respýblıkasy Ulttyq ulany Áskerı ınstıtýtynyń áskerı orkestri, «Ońtústik», «Ortalyq», «Batys» jáne «Shyǵys» óńirlik qolbasshylyqtarynyń áskerı orkestrleri qatysýda.
Festıvaldiń ashylý saltanatynda Ulttyq ulan Bas qolbasshysynyń orynbasary general-maıor Albert Matkarımov qonaqtar men baıqaý qatysýshylaryn quttyqtap, shyǵarmashylyq tabys tiledi.
Qazylar alqasy baıqaýǵa qatysýshylardyń ónerin ujymdyq aýyzbirshiligi, kompozıtsııalar repertýary, akterlik sheberligi, reglamentti saqtaýy, saptyq júrisi syndy krıterııler boıynsha baǵalaıtyn bolady.
Jeńimpazdardy marapattaý 23 maýsym kúni (saǵat 19.00-de) Astana qalasyndaǵy «Qazaqstan» sport saraıynda «Áskerı kerneı» festıvaliniń qorytyndy kezeńinde ótedi.
Sonymen birge festıvaldiń aqtyq óner keshine Memlekettik kúzet qyzmetiniń (Prezıdenttik orkestr) áskerı orkestri men Qurmet qaraýyl rotasy, UQK Shekara qyzmetiniń birlesken orkestri jáne QR Qorǵanys mınıstrliginiń Ortalyq orkestri qatysady. Óner dodasynyń kórkin shet elderden kelgen Reseı Federatsııasy Ulttyq ulany áskeri Oral okrýgy shtabynyń áskerı orkestri men Qytaı Halyq Respýblıkasy Halyqtyq qarýly polıtsııasynyń orkestri qyzdyra túspek.
Otansúıgishtik pen urpaqtar sabaqtastyǵy rýhynda órilgen Plats-kontsert «EKSPO-2017» halyqaralyq kórmesi is-sharalary aıasynda ótkizilip, ondaǵy klassıkalyq, halyqtyq jáne estradalyq mýzykalyq týyndylarmen qatar, jaýyngerlik parad-defıle, áskerı-qyzmetshilerdiń qarý-jaraqpen kórsetiletin tanymdyq kórsetilimderi Astana jurtshylyǵy men qonaqtary úshin este qalarlyqtaı jarqyn kórsetilim bolmaq.
