Astanada áskerı orkestr qala turǵyndary aldynda óner kórsetti
ASTANA. KAZINFORM - Otan qorǵaýshylar kúni aıasynda Qazaqstan Respýblıkasy Qarýly kúshteri Ulttyq áskerı-patrıottyq ortalyǵynyń Ortalyq áskerı orkestri astanalyqtarǵa ónerlerin kórsetti, dep habarlady elorda ákimdiginiń resmı saıty.
Qalyptasqan dástúr boıynsha áskerı mýzykanttar elordanyń halyq eń kóp jınalatyn ortalyq saıabaǵynda óner kórsetip, qala turǵyndary men qonaqtaryn Otan qorǵaýshy kúnimen jáne Jeńis kúnimen quttyqtady.
QR Qarýly kúshteriniń bas áskerı dırıjeri, podpolkovnık Almas Ibragımovtiń sózinshe, Ortalyq áskerı orkestr ujymy mundaı jıyndarǵa erekshe mán beredi.
«Búgingi jıyn elordada alǵash ret emes jáne sońǵy ret dep aıtýǵa bolmaıdy. Ylǵı da orkestr halyq kóp jınalatyn oryndarda, saıabaqtarda jáne túrli oıyn-saýyq ortalyqtarynda óz ónerlerin kórsetip jatyr. Jalpy orkestirimizde 34 adam bar. Olar búgin tanymal kompozıtsııalardy oryndaıtyn bolady. Jalpy mundaı jıyndar qala turǵyndarynyń patrıottyq sezimderin oıatady. Bul joly da áskerı mýzykanttar tyńdaýshylarǵa merekelik kóńil-kúı syılaı aldy dep tolyq senimmen aıtýǵa bolady»,- deıdi ol.
Bas dırıjerdiń aıtýynsha, áskerıler bir sapta turyp án oryndaý úshin uzaq ýaqyt daıyndalady.
«Áskerı orkestr mundaı jıynǵa 2-3 aptadan bastap 2-3 aıǵa deıin ýaqytta daıyndalady. Ol oryndaıtyn kompozıtsııanyń kúrdeliligine baılanysty. Orkestrge kez kelgen áskerı adamdy ala almaımyz. Ol úshin azamattyń kem degende orta mýzykalyq bilimi bolýy kerek. Odan bólek úrmeli nemese soqpaly aspaptarda oınaı alýy kerek»,- deıdi bas dırıjer Almas Ibragımov.