Astanada áskerı qyzmetshiler órtengen páterden er adamdy qutqardy

ASTANA. QazAqparat - Elordada Ulttyq gvardııanyń 3660-shy Áskerı bólimshesiniń áskerı qyzmetshileri - serjant Aızat Dúısekeev pen qatardaǵy ásker Aleksandr Sýşık órtke oranǵan páterden er adamdy qutqaryp aldy, dep habarlaıdy QazAqparat QR Ulttyq gvardııasynyń baspasóz qyzmetine silteme jasap.

«Keshe keshkisin Astanadaǵy Beıbitshilik pen Moldaǵulova kósheleriniń qıylysynda serjant Aızat Dúısekeev pen qatardaǵy ásker Aleksandr Sýşıkke áıel adam kómek suraı júginip, egde jastaǵy er adam tútinge oranǵan páterde qalyp qoıǵanyn aıtady. Ulttyq gvardııanyń 3660-shy Áskerı bólimshesiniń áskerı qyzmetshileri áıel baǵyt siltegen jaqqa shapshań attanǵan», - dep málimdedi baspasóz qyzmeti.

Úıdiń kireberisi de ıis gazyna oranyp úlgergen. Páterge kirgen gvardııashyldar qoıý qara tútinniń arasynan er adamdy alyp shyǵady. Artynsha, úıdiń basqa turǵyndaryn da evakýatsııalaıdy.

Olar órt sóndirý qyzmeti men jedel medıtsınalyq járdem kelgenshe turǵyndarǵa kómek kórsetken.