Astanada áskerı qurylymdar arasynda jekpe-jekten saıys ótedi
ASTANA. QazAqparat - 28-29 qarasha aralyǵynda Astanada jekpe-jek saıysynan QR Joǵarǵy Bas qolbasshysynyń kýbogyna arnalǵan IІІ ashyq respýblıkalyq týrnır ótedi, dep habarlaıdy «QazAqparat» HAA tilshisi.
Іri sporttyq shara QR Prezıdenti kúnine oraı «Dáýlet» sport kesheninde erler arasynda uıymdastyrylady. Jarysqa respýblıkanyń ár óńirinen, qýatty qurylymdardan jasaqtalǵan 55, 60, 65, 70, 75, 80, 85, 90 jáne 90 keliden joǵary 9 túrli salmaq dárejesi boıynsha 26 komanda synǵa túspek.
«Atalǵan týrnır otandyq sportshylardyń jáne elimizdiń qýatty qurylymdarynyń qyzmetkerleri men áskerı qyzmetshileriniń kásibı biliktiligin arttyrýǵa baǵyttalǵan.
Sondaı-aq, sport súıer qaýym úshin týrnır barysynda baǵaly syılyqtar men lotereıa oınatylady. Kórermen nazaryna QR MKQ Prezıdenttik orkestriniń kontserttik baǵdarlamasy men QR Memlekettik kúzet qyzmeti qyzmetkerleriniń jekpe-jek saıysynan qoıylymdyq kórsetilimder usynylady», - deıdi týrnırdi uıymdastyrýshylar.
Atalǵan dúbirli dodanyń ótýine jekpe-jek saıysynan Búkilqazaqstandyq qaýymdastyq pen QR Mádenıet jáne sport mınıstrliginiń sport jáne dene shynyqtyrý komıteti uıytqy bolyp otyr.
Jarystyń saltanatty ashylý rásimin 28 qarasha kúni saǵat 15:00-de ótkizý josparlanǵan. 29 qarasha kúni saǵat 18:00-de týrnır qorytyndysy boıynsha úzdikter anyqtalyp, jeńimpazdardy marapattaý rásimi ótedi.
