Astanada áskerı qyzmetshiler Jeńis mereıtoıyna arnalǵan saltanatty sherýdi pysyqtady
ASTANA. KAZINFORM – Astanada Jeńistiń 80 jyldyǵy men Otan qorǵaýshylar kúnine arnalǵan áskerı paradtyń sońǵy daıyndyǵy ótti.
Saltanatty is-shara 7 mamyr kúni «Qazaq eli» monýmenti janyndaǵy Táýelsizdik alańynda ótedi. Paradqa 4 000-nan astam áskerı qyzmetshi qatysady. Oǵan qosa, qala turǵyndary men qonaqtary 200-den astam zamanaýı áskerı tehnıka men qarý-jaraqty, áskerı-kólik avıatsııasynyń 66 ushaǵy men tikushaǵyn tamashalaı alady.
Parad saǵat 11:00-de bastalady. Saltanatty sherýdi QR Prezıdentiniń Teleradıokesheni túsiredi. Kórermender áskerı sherýdi Jibek Joly jáne Silk Way telearnalarynan tikeleı efır arqyly tamashalaı alady.
Sondaı-aq áskerı sherý respýblıkalyq telearnalardan, elimizdiń barlyq qalasynda LED-ekrandardan, Qorǵanys mınıstrliginiń resmı YouTube-arnasynan tikeleı efırde kórsetiledi.
Paradtan keıin saǵat 12:00-den 15:00-ge deıin dál osy alańda qazaqstandyq estrada juldyzdary men shyǵarmashylyq ujymdardyń merekelik kontsertteri ótedi.
Merekelik paradqa Ekinshi dúnıejúzilik soǵys ardagerleri, tyl eńbekkerleri, áskerı qımyldarǵa qatysýshylar, QR Qarýly kúshteriniń úzdik bólimsheleri, qurmet qaraýyly rotalary, QR Qarýly kúshteri, basqa da áskerı qurylymdardyń ardagerleri jáne áskerı quqyq qorǵaý organdarynyń ókilderi shaqyrylǵan.
Parad repetıtsııalary kezinde jáne 7 mamyrdaǵy parad kúni alańda áskerı-medıtsınalyq jáne azamattyq mamandar kezekshilik etedi. Olar qajet bolǵan jaǵdaıda bilikti medıtsınalyq kómek kórsetýge ázir.
Bul kúnderi áskerı tehnıkanyń qaýipsiz júrýin qamtamasyz etý úshin birqatar kóshede ýaqytsha shekteýler engizilip, avtobýs baǵyttary ózgeredi, keıbir jaıaý júrginshiler ótkelderi jabylady.
Aıta keteıik, Astanada Ekinshi dúnıejúzilik soǵys Jeńistiń 80 jyldyǵyna oraı 9 mamyrda demeýshilik qarajat esebinen uıymdastyrylatyn merekelik otshashý ótedi.