Astanada «Áskerı kerneı» festıvali bastaldy
Halyqaralyq festıval El Táýelsizdginiń 25 jyldyǵy men Qazaqstan polıtsııasy kúnine arnalyp otyr.
Festıvaldiń alǵashqy kúninde Ulttyq ulannyń óńirlik qolbasshylyqtarynda irikteý syndarynan súrinbeı ótken Qazaqstan Respýblıkasy Ulttyq ulanynyń úzdik degen áskerı orkestrleri óner kórsetti. Olardyń qatarynda Ulttyq ulannyń úlgili-kórsetimdi orkestri, Áskerı ınstıtýttyń áskerı orkestri, «Ońtústik» óńirlik qolbasshylyǵy 6506 áskerı bóliminiń áskerı orkestri, «Ortalyq» óńirlik qolbasshylyǵy 6505 áskerı bóliminiń áskerı orkestri, «Batys» óńirlik qolbasshylyǵy 5517 áskerı bóliminiń áskerı orkestri jáne «Shyǵys» óńirlik qolbasshylyǵy 5518 áskerı bóliminiń áskerı orkestri bar.
Erteń 5573 áskerı bóliminiń saptyq alańynda V halyqaralyq «Áskerı kerneı» festıvaliniń ashylýy ótedi. Festıvaldiń aqtyq óner keshine Memlekettik kúzet qyzmetiniń (Prezıdenttik orkestr) áskerı orkestri men qurmet qaraýyl rotasy, UQK Shekara qyzmetiniń birlesken orkestri jáne QR Qorǵanys mınıstrliginiń Ortalyq orkestri qatysady.
Óner dodasynyń kórkin shet elderden kelgen Reseı Federatsııasy Áskerdiń Federaldy qyzmeti Ulttyq ulanynyń Soltústik-Kavkaz óńirlik qolbasshylyǵy shtabynyń áskerı orkestri (Dondaǵy Rostov qalasy) men Qytaı Halyq Respýblıkasy Halyqtyq qarýly polıtsııasynyń orkestri qyzdyrady. Qatysýshylar túrli janrdaǵy mýzykalyq kompozıtsııalaryn oryndaıdy.
Osy kúni keshke taman elordanyń birqatar alańdarynda bir ýaqytta áskerı orkestrler ujymy qala turǵyndary aldynda óner kórsetedi. («Jastar» saraıynyń alańynda, «Baıterek» monýmenti alańynda jáne «Qazaqstan» sport kesheni janyndaǵy Esil ózeni jaǵasynda).
Al, senbi kúni Astana qalasy ákimdiginiń alańynda Qazaqstan Respýblıkasy Ulttyq ulan Bas qolbasshysynyń júldeleri úshin V halyqaralyq «Áskerı kerneı» festıvaliniń Saptyq kontserti ótedi. Dál osy jerde saıystyń jeńimpazdary men júldegerleri anyqtalatyn bolady.
Saltanatty sátte úzdik orkestr ujymdaryna baǵaly syılyqtar men dıplomdar tabys etiledi.
