Astanada áskerge shaqyrylýshylardyń alǵashqy legin Shekara qyzmetine shyǵaryp saldy
ATYRAÝ. KAZINFORM – Elordada Qorǵanys isteri jónindegi departamentiniń jınaý pýnkti bazasynda áskerge shaqyrý jasyndaǵy jastardy Ulttyq qaýipsizdik komıteti Shekara qyzmetiniń qataryna shyǵaryp salý saltanatty rásimi ótti.
Іs-sharaǵa Qorǵanys mınıstrliginiń, UQK Shekara qyzmetiniń ókilderi, Qarýly kúshterdiń ardagerleri, sondaı-aq áskerge shaqyrylýshylardyń týǵan-týystary men jaqyndary qatysty. Bozbalalar Shyǵys Qazaqstan oblysynyń Kúrshim aýylynda ornalasqan, jarty ǵasyrdan astam tarıhy bar ári Qazaqstan Respýblıkasynyń Memlekettik shekarasyn qorǵaý boıynsha mańyzdy mindetterdi atqaratyn áskerı bólimde qyzmet etetin bolady.
– Otan shebin qorǵaý – úlken mártebe ári zor abyroı. Osyǵan laıyqty ul tárbıelep ósirgen ata-analarǵa shynaıy alǵysymdy bildiremin. Áskerge shaqyrylýshylarǵa myqty densaýlyq, senimdilik, tózimdilik pen áskerı isti meńgerýde tabys tileımin. Bul qyzmet sizder úshin tulǵa retinde qalyptasý men jarqyn bolashaq qurý jolyndaǵy mańyzdy qadam bolsyn, – dedi Astana qalasy Qorǵanys isteri jónindegi departamentiniń ókili, zapastaǵy polkovnık Ǵanı Artyqov.
Áskerge shaqyrylýshylardyń arasynda jergilikti áskerı basqarý organyna óz erkimen kelgen 19 jasar Berik Inoıatov ta bar. Ol bıyl Astana qalasynyń Joǵary medıtsınalyq kolledjin aıaqtaǵan.
– Naǵyz azamat óz ýaqytynda áskerde boryshyn ótep, Otan aldyndaǵy mindetin oryndaýy tıis dep esepteımin. Buryn shekaradaǵy qyzmet týraly fılmderdi qaraıtyn edim, al endi ózim osy atmosferaǵa enip, naǵyz ómir mektebinen ótip, ózimdi shyńdaı túsemin. Memlekettik shekarany qorǵaýǵa óz úlesimdi qosa alatynyma maqtanamyn jáne áskerı boryshymdy abyroımen oryndaýǵa tyrysamyn, – dep óz oıymen bólisti.
Shaqyrylýshy Serikbolsyn Aınabekovtiń ájesi áskerge ekinshi nemeresin shyǵaryp salyp otyr.
– Bıyl dál osy jerden úlken nemerem Dıasty Shekara qyzmetine shyǵaryp salǵan edik. Ol qyzmetin aman-esen ótep, oraldy. Búgin kezek Serikbolsynǵa keldi. Ol da aǵasynyń jolyn qýyp, shekarada qyzmet etetin bolady. Bul bizdiń otbasymyz úshin úlken maqtanysh ári jaýapkershilik. Jigitterimizge shyn júrekten myqty densaýlyq, tózimdilik jáne sátti qyzmet tileımin, – dedi ol.
Áskerı qyzmetti ótkerý kezeńinde sarbazdarǵa kredıttik demalystar beriledi. Budan bólek, zapasqa shyǵarylǵannan keıin jaýyngerlik daıarlyqtyń úzdikteri UBT tapsyrmaı-aq eldiń joǵary oqý oryndaryna memlekettik grantqa túse alady. Ne bolmasa kelisimshart boıynsha áskerı qyzmetin jalǵastyrýǵa múmkindikteri bar.
Bıyl Astanadan merzimdi áskerı qyzmetke 1 400 azamat attanady, olardyń 190-y UQK Shekara qyzmetine barady.
