Astanada ashylǵan jańa úlgidegi balabaqshanyń artyqshylyqtary qandaı
ASTANA. QazAqparat - Astanada QR Prezıdenti Іs basqarmasy Medıtsınalyq ortalyǵynyń jańa úlgidegi balabaqshasy ashyldy, dep habarlaıdy QazAqparat tilshisi.
Elordadaǵy eń úlken balabaqsha bolyp sanalatyn 350 oryndyq jańa mekeme QR ortalyq memlekettik organdaryndaǵy memlekettik qyzmetshilerdiń balalaryna arnalǵan jáne onda balalardyń mektepke deıingi bilim alýy úshin barlyq jaǵdaı jasalǵan.
Jańa balabaqsha aýmaǵynda mýzykalyq jáne sporttyq zal, horeografııa zaly, basseın, balalardyń ıntellektýaldy damýyna arnalǵan oqý bólmeleri jáne erteńgilikter ótkizetin zaldary bar.
Ásirese ınteraktıvtik tehnologııalar bólmesi balalar úshin erekshe qyzyq ári mańyzdy bolmaq. Ondaǵy aqyldy ınteraktıvtik eden balalar oıynyn jandandyrýǵa, jańa tehnologııalardy meńgerýge múmkindik beredi.
Arnaıy medıtsınalyq aýmaqta fızıokabınet pen massaj bólmesi, ata-analardy qabyldaý bólimi ornalasqan. Onda balalar fıtoterapııa, saýyqtyrý massajy, taban massajyn alyp, emdik dene shynyqtyrýmen aınalysady.
Oqý-tárbıe barysy qazaq jáne orys tilderinde jáne qosymsha aǵylshyn tilinde júredi. Qazaq tilinde basymdyq beretin mekeme qyzmetkerleri balalarǵa memlekettik tildi úıretýdiń jańa ádisin qoldanady.
«Ana tilin bilmeıtin balanyń esh jazyǵy joq. Bizdiń negizgi maqsatymyz - balalarǵa memlekettik tildi úıretý. Ol úshin pedagog pen kómekshiler balamen jarty kún oryssha, jarty kún qazaq tilinde sóılesedi. ıAǵnı, kúnniń ekinshi jartysynda oqý-tárbıe protsesi tolyq qazaqsha ótedi. Balalar aýyzeki sózdi estip, túsinip, sóıleı bastaıdy. Osylaısha, eki jyl ishinde balalar tilge enip, úshinshi jyly tolyq qazaq tobyna aýysady», - deıdi mekemeniń dırektory Gúlnar Abdýllına.
Balabaqshaǵa 3-7 jas aralyǵyndaǵy balalar qabyldanady. Ortasha alǵanda balabaqshanyń bir aılyq quny 22 myńnan bastalady. Ata-ana qalaýymen bala qosymsha úıirmelerge qatysar bolsa - tólemaqy shamamen 35 myń teńge bolmaq.
