Astanada ashylǵan 51-shi halyqaralyq matematıkalyq olımpıada barysynda oqýshylar eki kúnniń ishinde alty esepti shyǵarýlary tıis
ASTANA. Shildeniń 6-sy. QazAqparat /Gúlmıra Álıakparova/ - Astanada ashylǵan 51-shi halyqaralyq matematıkalyq olımpıadada oqýshylar álemniń ataqty matematıkteri qurastyrǵan 6 esepti eki kúnniń ishinde shyǵarýy tıis bolady.
Bul týraly olımpıadanyń ashylý saltanatynda jýrnalısterge bergen suhbatynda dúnıejúzilik deńgeıdegi otandyq matematık ǵalym, qazylar alqasy tóraǵasynyń orynbasary Asqar Jumadildaev aıtty.
«51-shi Halyqaralyq matematıkalyq olımpıadanyń Qazaqstanda ótýi, dúnıejúziniń eń myqty degen matematıkteriniń Qazaqstanǵa at basyn burýy bizdiń matematık ǵalymdar úshin úlken abyroı, úlken maqtanysh. Biz qazir Almatydan kele jatyrmyz. Onda esepterdi tańdaýmen qatar, halyqaralyq olımpıadanyń endigi tóraǵasy kim bolady degen sekildi iri máseleler sheshildi. Matematıka túsiniksiz ǵylym sanalǵanymen kez kelgen eldiń ǵylym deńgeıi osy matematıka ǵylymynyń deńgeıimen ólshenedi», - dep atap ótti ol.
Qazylar alqasy olıpıadaǵa usynylǵan 2 myńǵa jýyq eseptiń 6-ýyn taldap aldy. Jarystar «Baldaýren» respýblıkalyq oqý-saýyqtyrý ortalyǵynda ótedi. Eki kúnge jalǵasatyn olımpıadanyń ár kúninde oqýshy 3 esepten shyǵarýy tıis bolady. Oǵan 4 saǵat ýaqyt berilmek. Qalǵan úsh kúnde qazylar alqasy jumys istep, shildeniń 13-i kúni Astanada jeńimpazdardy jarııalaıtyn bolady.
A.Jumadildaev atap kórsetkendeı, esepter óte qıyn jáne baǵalaý barysynda onyń shyǵarylý ádisi men órnegine mán beriletin bolady. «Birinshiden, eseptiń shyǵarylýy óte ádemi bolýy kerek. Ekinshiden, óte qıyn da, óte ońaı da bolmaýy kerek. Osy eki shartty qanaǵattandyratyn, ertegi sııaqty esepti shyǵarý ońaı sharýa emes», - deıdi ol.
Aıta keteıik, Halyqaralyq matematıkalyq olımpıadaǵa 100-ge tarta eldiń árqaısysynan 6 oqýshydan keldi. Olardyń arasynda buǵan deıin túrli halaqyralyq dodalarda júldeli oryndardy ıelenip júrgen 6 otandasymyz da bar. Olımpıadanyń buǵan deıingi jarystarynda júldelerdiń basym denin Qytaı Halyq Respýblıkasynyń jastary oljalap keldi. 2009 jyly Germanııada ótken 50-shi olımpıadada qazaqstandyq jastar 3 kúmis pen 3 qolany jeńil aldy.
