Astanada ashyq aspan astynda balettik qoıylym ótkiziledi
ASTANA. QazAqparat - Búgin, 2 shildede elorda kúni qarsańynda Táýelsizdik saraıy aldyndaǵy ashyq alańda «Astana Opera» teatry L. Mınkýstyń keremet «Baıaderka» balettik spektaklin usynady. Bul týraly teatrdyń baspasóz qyzmeti habarlady.
Mádenıet jáne sport mınıstrliginiń jańa jobasy - ashyq aspan astyndaǵy balettik qoıylymy - Astana kúni qarsańynda qala turǵyndary men qonaqtaryna tamasha syı bolady.
Uıymdastyrýshylar áserli de jarqyn, aýqymdy beıne-ınstallıatsııaly saýyqtyq balet, qalamyzdaǵy merekelik is-sharalarǵa erekshe kórik beredi dep esepteıdi.
Áıgili stsenograf Etsıo Frıdjerıo daıyndaǵan ekzotıkalyq Úndistannyń áserli kórinisteri, «Oskar» syılyǵynyń ıegeri Franka Skýarchapınonyń tańdaýly kostıýmderi Táýelsizdik saraıy aıasynda ótetin merekege jańa reń beretini sózsiz.
«Astana Opera» teatrynyń shyǵarmashylyq tobynyń pikirinshe, mundaǵy drama men lırıkanyń úılesimdi baılanysy, dıvertısmenttik bılerdiń áralýandyǵy, álemdik horeografııanyń jaýharlarynyń biri sanalatyn áıgili kóleńkeler patshalyǵy kórinisiniń áserli kórkemdigi, kórermenge eń jarqyn jáne tereń áser qaldyrady.
«Jobamyz Táýelsizdik saraıynyń sáýleti men kórkem dızaınyn eskere otyryp jasaldy. Kórermenge arnalǵan 1 400 orny bar úsh deńgeıli alań daıyndaımyz, sondaı-aq tropıkalyq djýnglııada tunyp turǵan ásem saltanatty saraılar, jumbaq ǵıbadathanalar boı kóteretin shymyldyǵy bar sahnalyq alań bolady. Qoıylym sońynda sahna ústinde paıda bolatyn balerınalardyń kóleńkesi arnaıy tuǵyr arqyly júzege asyrylady. 20 astam proektor arqyly kórsetiletin beıneler, Táýelsizdik saraıy ǵımaratynyń tóbesin tutas qamtıdy», - deıdi «Astana Opera» teatrynyń kórkemdik qoıylym kesheniniń jetekshisi Vıktor Karare.
Áıgili balet jelisindegi mahabbat úsh taǵanynyń keıipkerleri - názik baıaderkashy Nıkııa, erjúrek jaýynger Solor jáne radjdyń tákappar qyzy Gamzattı. Bul kúni basty partııalardy qazaqstandyq balettiń jarqyraǵan juldyzdary, «Astana Opera» teatrynyń jetekshi solısteri, Qazaqstannyń eńbek sińirgen qaıratkerleri Mádına Baspaeva (Nıkııa), Taıyr Gataýov (Solor), Gaýhar Ýsına (Gamzattı) oryndaıdy. Qoıylymǵa 120 jýyq balet ártisi men mımans qatysady.
«Ashyq aspan aıasynda bılegende, erekshe kúıge enesiń. Samal jeldiń kostıýmdi jelpip ótkenin, ulanǵaıyr keńistik pen múlde basqa jaryqty seziný - osynyń barlyǵy alǵashynda ártister úshin úırenshikti emes. Kúnniń ashyq bolatynyna úmittenemiz, óıtkeni, aýa shamaly ylǵaldansa, baletke arnalǵan eden sýlanady da, onyń ústinde bıleý múmkin emes», - deıdi spektakldiń qoıýshy horeografy, «Astana Opera» balettik trýppasynyń kórkemdik jetekshisi Altynaı Asylmuratova.
