Astanada Áshirbek Syǵaıdyń 70 jyldyǵyna arnalǵan festıval ótedi
ASTANA. QazAqparat - Jyl saıyn uıymdastyrylatyn Qazaqstan drama teatrlarynyń XXV respýblıkalyq festıvali kórnekti teatr synshysy, QR eńbek sińirgen óner qaıratkeri, Memlekettik syılyqtyń laýreaty Áshirbek Syǵaıdyń 70 jyldyǵyna arnalady, dep habarlaıdy QazAqparat.
Bar ǵumyryn teatr ónerine arnaǵan sarabdal synshy, biregeı teatr qaıratkeriniń shyǵarmashylyǵyn kópshilikke dáripteý, sońynan qaldyrǵan muralaryn jańǵyrtý, esimin el esinde máńgi qaldyrýdy maqsat etken festıval Astanada 9-13 qyrkúıek kúnderi ótedi.
«Jyl saıyn ótkizip kele jatqan festıvaldi bıyl Áshirbek Syǵaıǵa arnaýdy uıǵardyq. Bizdiń teatr ónerin álemdik arenada kórsetip júrgen sanaýly synshylardyń biri úsh jyl buryn ómirden ozdy. Qandaı festıval ótse de, teatrdyń ádil qazy alqasyn Áshirbek aǵa basqaratyn», - deıdi Qazaqstan teatrlary qaýymdastyǵynyń vıtse-prezıdenti
Festıvalge sońǵy 2-3 teatrlyq maýsymda tusaýkeseri ótken jáne bedeldi teatr synshylarynyń joǵary baǵasyna ıe bolǵan, buryn festıvalderge qatyspaǵan úzdik qoıylymmen qatysýǵa elimizdiń drama, mýzykalyq drama, mýzykalyq-komedııa, satıra, balalar men jasóspirimder teatrlary qatysady. Olardyń arasynda respýblıkalyq Ǵ. Músirepov atyndaǵy qazaq Memlekettik akademııalyq balalar men jasóspirimder teatry, Atyraý oblystyq Mahambet atyndaǵy qazaq drama teatry, Respýblıkalyq akademııalyq nemis drama teatry, Q. Qýanyshbaev atyndaǵy Memlekettik akademııalyq qazaq mýzykalyq drama teatry, Aqmola oblystyq orys drama teatry, Astana Jastar teatry, Shyǵys Qazaqstan oblysy «Darıǵa-aı» jastar teatry, «Jas sahna» teatrlary bar.
Festıvaldiń resmı ashylýy 9 qyrkúıek kúni saǵat 17:00-de «Jastar» teatry sahnasynda ótedi. Bes kún boıy Astana qalasynyń qonaqtary men turǵyndary festıval qoıylymdaryn Q. Qýanyshbaev atyndaǵy Memlekettik akademııalyq qazaq mýzykalyq drama teatry, «Qazaqstan» Ortalyq Kontsert Zaly jáne Jastar teatry sahnalarynan tegin tamashalaı alady.
