Astanada ashylatyn jańa balalar travmpýnkti qandaı bolady
ASTANA. KAZINFORM — Astanada balalarǵa shuǵyl kómek kórsetetin jańa travmpýnkt iske qosylady, dep habarlaıdy DSM baspasóz qyzmeti.
Astanada eresekter men balalarǵa kórsetiletin jedel medıtsınalyq kómektiń múmkindikteri keńeıip keledi. Qazan aıynda № 2 kópbeıindi qalalyq balalar aýrýhanasynyń bazasynda jańa balalar travmpýnktin ashý josparlanǵan.
Qurylys nysandaryn iske asyrý barysymen jáne úsh kópbeıindi statsıonardyń jumysymen Densaýlyq saqtaý mınıstri Aqmaral Álnazarova tanysty.
Jańa travmpýnktte zamanaýı reanımatsııa bólimi, operatsııalyq blok jáne qajetti medıtsınalyq jabdyqtar kózdelgen. Nysan balalarǵa shuǵyl medıtsınalyq kómek kórsetý qyzmetine túsetin joǵary júktemeni jáne medıtsınalyq kómekti uıymdastyrýdyń zamanaýı talaptaryn eskere otyryp jobalanǵan.
Bul kishkentaı patsıentterdi qabyldaýǵa barynsha qolaıly jaǵdaı jasap, jaraqat alǵan balalarǵa medıtsınalyq kómekti ýaqtyly ári sapaly kórsetýge múmkindik beredi.
№ 1 kópbeıindi qalalyq aýrýhanada mınıstr jańartylǵan qabyldaý bólimin jáne beıindi bólimshelerdi aralap, medıtsınalyq kómekti uıymdastyrý barysymen jáne aýrýhanany odan ári jańǵyrtý josparlarymen tanysty.
Bıylǵy jyldyń segiz aıynda statsıonarda 19,7 myńnan astam patsıent em qabyldap, 11 myńnan astam operatsııa jasalǵan. Ótken jyldyń sáıkes kezeńimen salystyrǵanda hırýrgııalyq kómektiń kólemi artyp, patsıentterdiń statsıonarda emdelýiniń ortasha uzaqtyǵy qysqarǵan.
2027 jyly aýrýhanany rekonstrýktsııalaý josparlanǵan. Joba ınfraqurylymdy jańartýǵa, sondaı-aq patsıentter men medıtsına qyzmetkerleri úshin qolaıly jaǵdaı jasaýǵa baǵyttalǵan.
Medıtsınalyq uıymdarǵa barý qorytyndysy boıynsha qurylys jumystaryn ýaqtyly aıaqtaý, jańa bólimshelerdi qajetti jabdyqtarmen qamtamasyz etý jáne olardy ashýǵa daıyndaý máseleleri qaraldy.
Osydan buryn dárigerlerge synyq pen aýyr jaraqat kezinde qajet quraldar kóbeıetinin jazǵanbyz.
