Astanada Art Sport baǵdarlamasyna qatysty másele taǵy qozǵaldy

ASTANA. KAZINFORM – Astana qalalyq qoǵamdyq keńes múshesi Qanat Alın «Damubala» (burynǵy ataýy Art Sport) baǵdarlamasynyń oryndalýy barysyna kúmán keltirdi. Onyń aıtýynsha, sapaly sporttyq nysandar salýdy qarjylandyrý jaǵy aqsaıdy. Sonymen qatar barlyq sanattaǵy balalardy sporttyq úıirmelermen qamtýda qarajattyń tıimdi jumsalý máselesin kóterdi.  

«Bul baǵdarlama sporttyq jáne shyǵarmashylyq úıirmelerdi jan basyna qarjylandyrady. Onyń ishinde meni sport sektsııalaryn qarjylandyrý máselesi qyzyqtyrady. Óıtkeni bul salaǵa qatysty suraqtar bar», - dedi Qanat Alın qoǵamdyq keńeste qala bıýdjetin talqylaý barysynda.

Keńes múshesiniń málimdeýinshe, qazir ár aımaqtyń konkýrsty óz betinshe ótkizýge quqyǵy bar. Astana kún sanap damyp keledi, bul ınvestorlar úshin qaýipsizdik talaptaryna saı sport nysandaryn salýǵa keń múmkindik. 

Sondaı-aq spıker kóptegen sporttyq nysannyń órt qaýipsizdigi standarttarǵa jáne sanıtarlyq normalarǵa sáıkes kelmeıtindigin aıtty. 

«Áriptesterimmen birge bıýdjet esebinen tólenetin sporttyq úıirmelerde balalarǵa qandaı jaǵdaı jasalǵanyn óz kózimizben kórýge birneshe ret tyrystyq. Biraq bizge ruqsat berilmedi, suraq kóp. Sondyqtan Dene shynyqtyrý jáne sport basqarmasynyń jańa basshylyǵynan baǵdarlamanyń shartyn qaıta qaraýdy suraımyn. Qarjy barlyq sanattaǵy balalarǵa teńdeı ári durys bólinip jatyr ma? Sebebi bıýdjet rezeńke emes, bizde mektep jetispeıdi, al úshin qurylysqa qarajat jetispeıdi. Kúnderdiń bir kúni bul problema aldymyzdan shyǵady. Tolyq emes otbasylardan shyqqan, múgedektigi bar sanattaǵy balalardyń tizimin naqty anyqtaý qajet. Biz osy máselege núkte qoıǵan kezde, basqa baǵyttardy damytýdyń múmkindigi týady», - deıdi Qanat Alın. 

Eske sala ketsek, Prezıdent tapsyrmasy aıasynda tegin úıirmeler (Art Sport baǵdarlamasy) alǵash elordada pılottyq joba túrinde qolǵa alyndy. Ýaqyt óte kele suranys kúrt artyp, 17 myń bala bıýdjet esebinen úıirmege jazylǵan. Esesine shaǵym kóbeıe tústi. 

Qyzmet usynýshy kásipkerler men ata-analar bul máseleni kóterip, mınıstrlik aldyna jınalǵan edi. 

Senator Rýslan Rústemov sol kezdegi Premer-Mınıstrdiń atyna depýtattyq saýal joldap, joba aıasyndaǵy kemshilikterdi aıtty.